26.11.2021

türkiye awazi radiyosi: «xabertürk» géziti: «türkiye diqqitini iqtisadiy nishanigha merkezleshtürdi» serlewhilik xewiride, (türkiye jumhuriyiti) dölet bixeterlik kéngishi yighinida, türkiyening nishanlirigha muwapiq meblegh sélish, ishlepchiqirish, ishqa orunlashturush we éksport siyasetlirini yolgha qoyush jeryanida yoluqqan we yoluqush éhtimali bolghan xiris we tehditlerning muhakime qilinip, türkiye jumhuriyiti qurulghanliqining 100 – xatire yili bolghan 2023 – yiligha barliq sahelerdikige oxshash iqtisadiy sahedimu küchlük halette qedem bésish iradisining tekitlengenliki toghrisidiki uchurlargha orun berdi.

«hörriyet» géziti: «<turkowak>ning yil axiridin burun emlinishke bashlinishidin ümid bar» serlewhilik xewiride, (türkiye jumhuriyiti) sehiye ministiri fahrettin kojaning, yuqumgha qarshi tereqqiy qildurulghan yerlik waksina — turkowakning «jiddiy ishlitilish testiqi» üchün iltimas sunulghanliqi toghrisidiki xewerlerning tarqilishidin kéyin bayanat bérip,  tür xizmetliri axirlashqan <tetqiq qilish – tereqqiy qildurush ishlepchiqirish merkizi>ge xéridar chaqirish paaliyitining aldimizdiki künlerde ötküzülidighanliqini, merkezning mushu sahediki dunyaning eng ilghar orni ikenlikini éytqanliqini yazdi.

«weten» géziti: «türkiye bankichiliq sahesi intayin küchlük» serlewhilik xewiride, türkiye jumhuriyiti merkizi bankisi bashliqi shahap kawjioghluning, bankichiliq sahesining türkiyening nöwettiki eng küchlük sahelirining biri ikenlikini bayan qilip, türk bankichilik sahesining pay kirimi, meblegh qurulmisi we xéridarlar qimmiti jehette dunyaningmu eng yaxshi sahelirining biri ikenlikini éytqanliqi toghrisidiki uchurlargha orun berdi.

«star» géziti: «ukraina: <türkiye bilen ornatqan hemkarliqimiz rayonning menzirisini özgertti (dédi)» serlewhilik xewiride, ukrainaning enqerede turushluq bash elchisi wasil bodnarning, türkiye bilen ukrainaning yéqinlishishining bu rayonning menzirisini özgertip, yéngi qaralmilarni barliqqa keltürgenlikini otturigha qoyup, ikki döletning peqet özarala emes, belki qara déngizgha tesir körsitidighan kawkaz, sherqiy aqdéngiz we bashqa döletler bilenmu hemkarliq ornitishni oylishishi kéreklikini tekitligenlikini yazdi.

«yéngi shepeq» géziti: «yawropada galatasarayning biliki égilmidi» serlewhilik xewiride, galatasaray komandisining yawropa chémpiyonluq birleshmisi E guruppisining 5- heptilik musabiqiside, firansiye komandisi marséliyani 2 ge qarshi 4 nomur bilen yéngip, 11 nomur bilen üstünlük ornini saqlap qalghanliqi,  guruppidin ghelibe bilen üzüp chiqishqa kapaletlik qilghan galatasaray komandisining, axirqi heptilik musabiqide bir nomurgha érishken teqdirde, guruppisini üstünlük bilen tamamlaydighanliqi toghrisidiki uchurlargha orun berdi.