03.09.2021

türkiye awazi radiyosi: «hörriyet géziti», türkiye tashqi ishlar ministiri mewlüt chawushoghluning tünügünki (2021-yili 2-séntebir) bayanatida, kabul ayrodurumini bashqurush toghrisida: «talibandin we bezi döletlerdin biz bilen hemkarlishish toghrisida telepler kéliwatidu. bularning hemmisini oylishimiz. hemme kishi xatirjem bolidighan shekilde bixeterlik ornitish kérek. buni talibangha yetküzduq» dégenlikini xewer qildi.

«sabah géziti», adalet we tereqqiyat partiyesining bayanatchisi ömer chelikning tünügün afghanistanning nöwettiki weziyiti toghrisida toxtilip, yüz bérishi mumkin bolghan köch dolqunigha qarshi xelqarani agahlandurghanliqini xewer qildi.

«star géziti», qatar tashqi ishlar ministiri sheyx muhemmed bin abdurrahman alsanining: «kabul ayrodurumini qayta échish üchün türkiye bilen birlikte tirishiwatimiz» dégenlikini xewer qildi.

«yéngi shepeq géziti», soda ministiri mehmet mushning 2021-yili awghust éyidiki éksport miqdarining ötken yilning oxshash mezgilige sélishturulghanda texminen %52 éship, 18.9 milyard dollargha yetkenlikini éytqanliqini xewer qildi.

xewerde, ministirning: « bu reqem bilen eng yuqiri awghust éyi éksport miqdarigha yettuq. yéqinqi 12 ayliq éksport reqemliri 207.5 milyard dollargha yétip, jumhuriyet tarixidiki rékort buzup tashlandi» dégenliki eskertildi.

«xeber türk géziti», wuxen wirusi (Kovid-19) sewebidin xizmet bérishtin toxtap qalghan kushadasi ege portining aridin ötken uzun mezgildin kéyin, tunji yoluchilar paraxotini kütüwalghanliqini xewer qildi.

xewerde, paraxottiki 450 rusiyelik sayahetchining kushadasidiki xelq senetchiliri teripidin qizghin kütüwélinghanliqi bildürüldi.