илһам әлийев азад қилинған районларни қайтидин қуруш һәққидә муһим сөз қилди
әзәрбәйҗан пирезиденти илһам әлийев 2 - қарабағ урушидин кейин азад қилинған районларни қайтидин қуруш вә әслигә кәлтүрүш арқилиқ хәлқара қатнаш линийәлириниң тәрәққий қилдурулиши үчүн кәң көләмлик хизмәтләрни башлиғанлиқини билдүрди.
түркийә авази радийоси хәвири: илһам әлийев түркмәнистанниң пайтәхти ашқабатта өткүзүлгән 6 - нөвәтлик каспий деңизи (һазар) дөләтлири рәһбәрләр йиғинида сөз қилип, әзәрбәйҗан болуш сүпити билән каспий (һазар) деңизи дөләтлириниң һәмкарлиқиға зор әһмийәт бәргәнликини тәкитлиди.
илһам әлийев каспий деңизиниң қануний салаһийити һәққидә тохтилип, ақтавда имзаланған һөҗҗәтниң күчкә игә болушиға әгишип, каспий (һазар) деңизи дөләтлири оттурисидики өз-ара тәсир вә һәмкарлиқни мәқсәт қилған техиму үнүмлүк тәдбирләр үчүн пухта қануний асасниң йаритилидиғанлиқини ейтти.
илһам әлийев каспий (һазар) деңизидики қатнашниң муһимлиқини тилға елип, «бүгүнки күндә әзәрбәйҗан йавро-асийаниң муһим қатнаш вә транспорт мәркизиниң биридур. әзәрбәйҗан шәрқ-ғәрб, җәнуб вә шималдики хәлқара қатнаш каридориниң тәрәққийатида муһим рол ойнимақта. биз каспий деңизидин һалқиған хәлқара қатнашни үнүмлүк ишлитиш үчүн тиришиватимиз. бу йол каспий деңизи дөләтлириниң қатнаш иқтидаридин әң йуқири дәриҗидә пайдилинишқа капаләтлик қилиду һәмдә қатнаш ул әслиһәлирини тәрәққий қилдурушниң йеңи лайиһәлириниң ишқа ашурулишиға шараит һазирлап бериду» деди.
илһам әлийев 2 - қарабағ урушида (2020-йили 9-айдин 11-айғичә) әзәрбәйҗан қолға кәлтүргән ғәлибә үстидиму тохтилип, «әзәрбәйҗан қарабағ вә шәрқий зангезурни қайта қуруш, әслигә кәлтүрүш , вә хәлқара қатнаш линийәсини тәрәққий қилдуруш үчүн кәң көләмдә хизмәт башлиди. зангезур каридори әмдиликтә реаллиққа айланмақта» деди.
әлийев екологийилик вәзийәткә қарита каспий (һазар) деңизи дөләтлириниң әндишилирини ортақлишидиғанлиқини вә каспий деңизидики муһит мәсилисини һәл қилиш үчүн һәмкарлиқни кеңәйтишни қоллайдиғанлиқини билдүрди.
