qasim jömert toqayéw qirghizistanni ziyaret qildi

türkiye awazi radiyosi xewiri: qazaqistan pirézidénti qasim jömert toqayéw qirghizistan paytexti béshkekte pirézidént sadir japparow teripidin resmiy murasim bilen kütüwélindi.

qasim jömert toqayéw bilen sadir japparow pirézidéntliq mehkimiside ayrim körüshkendin kéyin, heyetler ara uchrishish ötküzdi.

sadir japparow heyetler ara uchrishishta: «ikki dölet otturisida héchqandaq siyasiy qarimu qarshiliq yoq» dédi.

u qirghizistan we qazaqistanning ortaq tirishchanliqi netijiside, ikki terep munasiwetlirining téximu kéngiyidighanliqini bildürdi.

qazaqistan pirézidénti qasim jömert toqayéw ziyaritining, ikki dölet diplomatik munasiwet ornatqanliqining 30 –yilliqida emelge ashqanliqini alahide tekitlep: «bügün silerning küchlük hökümitinglar bilen, qirghizistanda muhim siyasiy, ijtimaiy we iqtisadiy islahatlar qiliniwatidu. döletni küchlendüridighan, xelqni ittipaqlashturidighan we qirghizistanning dunyadiki ornini yuqiri kötüridighan barliq tirishchanliqinglarni qollaymiz. qazaqistan bolush süpitimiz bilen, bu nishanlarning emelge éshishi üchün her türlük yardemlerni qilishqa teyyarmiz» dédi.

u sadir japparowning qazaqistan bilen köp tereplimilik shériklik munasiwet ornitishni arzu qilidighanliqini we bu jehette alahide tirishchanliq körsitiwatqanliqini bildürdi.

qasim jömert toqayéw bilen sadir japparowning huzurida, ikki dölet otturisida awiyatsiye izdesh-qutquzush saheside hemkarliq ornitish kélishimi, maarip, yéza igiliki, iqtisad we tiransiport saheliride, shundaqla yerlik hökümetler ara hemkarliq ornitish kélishimi imzalandi.