ezerbeyjan bash elchisi qazaqistandiki weqeler we türk döletliri teshkilati üstide toxtaldi

türkiye awazi radiyosi xewiri: ezerbeyjanning enqerede turushluq bash elchisi reshid mammadow türkiye bilen ezerbeyjan otturisidiki munasiwetlerning normal döletler ara munasiwet emes, belki qérindashliq munasiwitini asas qilidighanliqini, türkiye-ezerbeyjan qérindashliqining ülge ikenlikini bildürdi.

mammadof ezerbeyjanning türkiye bilen bolghan munasiwetlirining normal döletler ara munasiwettin üstün, qérindashliq we uruq -tughqanliq munasiwiti ikenlikini tilgha élip, ezerbeyjanning türkiye bilen birlikte tamamlighan layihesi üstide toxtaldi we baku-tiblis-jeyxan néfit turuba liniyesi shundaqla baku-tiblis-kars tömür yoli layihesini misal keltürdi.

ezerbeyjanning bu layihelerni ishqa ashurushida türkiyening yardimining intayin muhim bolghanliqini tilgha alghan mamadow, bu layihelerning hemmeylenning éhtiyajini qanduridighanliqini tekitlep, «türkiye héchbir döletke tehdit élip kelmeydu. türkiye peyda qilinghan tehditlerning aldini almaqta. ezerbeyjanmu oxshash. türkiye-ezerbeyjan qérindashliqi bir ülgidur» dédi.

mammadow ezerbeyjanning türkiyede peqet énérgiye sahesigila 19 milyard 500 milyon dollar meblegh salghanliqini eskertip, «türkiye dölet mudapie ministirliqigha tewe mudapie sanaitining paydisini kim köriwatidu? biz köriwatimiz. ezerbeyjan armiyesi türkiye endizisi üstige qurulghan» dédi.

türk döletliri teshkilatining muhimliqini tilgha alghan mammadof, bu teshkilatning bashqa teshkilatlargha oxshimaydighan shekilde «tebiiy» ikenlikini we bu teshkilatni eza döletler puqralirining arzu qilghanliqini éytti.

mammadow qazaqistandiki weqeler üstidimu toxtilip, «ijtimaiy mesililer, ichki amillarmu nahayiti chong idi, bu weqelerni suyiistémal qilghanlarmu köp idi» dédi.

mammadof bu weqelerdin kéyin qazaqistan we qazaqistan xelqining téximu bek küchiyidighanliqini éytti.