qazaqistanda bügün matem élan qilindi

türkiye awazi radiyosi xewiri: qazaqistanda pirézidéntliq sariyi aqorda, barliq dölet idare-organliri we chet ellerdiki elchixana, konsulxanilarda bayraqlar yérim chüshürüldi.

qazaqistanda barliq téléwiziye qanalliri we radiyolarda naxsha-muzika we köngül échish pirogrammiliri emeldin qalduruldi. ölet idare-organliri bilen xewer agéntliqlirining intérnét betlirining bash sehipiliri qara we aq rengge özgertildi.

türkiyening nursultan elchixanisi matem küni munasiwiti bilen bayanat élan qilip, türkiyening qazaq xelqi bilen hemkarliq ichide ikenlikini, bayraqlarning yérim chüshürülgenlikini bildürdi.

türkiye elchixanisining ijtimaiy taratqu betliride «qérindash qazaq xelqini qollaymiz» dégen ibare yézildi.

türk döletliri teshkilati sékrétarliqidimu barliq eza döletler we közetküchi döletlerning bayraqliri yérim chüshürüldi.

teshkilatning bayanatida: «qérindash qazaqistan xelqi we hökümiti bilen her qachan hemkarliq ichide bolghan türk döletliri teshkilati weqelerde jénidin ayrilghanlargha allahtin rehmet, yarilanghanlargha shipaliq tileymiz. qazaqistanning eng qisqa waqit ichide normallishishini tileymiz» dédi.

qazaqistan ichki ishlar ministirliqi weqelerde 18 xewpsizlik xadimini öz ichige alghan 26 kishining jénidin ayrilghanliqini élan qilghan idi.

qazaqistan pirézidénti qasim jömert toqayéw yüz bergen térrorluq heriketliri netijiside jénidin ayrilghanlar üchün 2022-yili 10-yanwarda dölet miqyasida matem élan qilishning qarar qilinghanliqini uqturghan idi.

qazaqistanda bügüngiche tutqun qilinghanlarning sani 7 ming 939 gha chiqti.

almutadiki weqelerge qatnashqanliqi ilgiri sürülüp tutqun qilinghan qirghizistanliq muzikant wikram rozaxonow qoyup bérildi.

taratqularda hembehrlengen körünüshlerde, rozaxonowning «pul bedilige namayishlargha qatnishish üchün qazaqistangha kelgenliki» ilgiri sürülüp, almutada tutulghan idi.

qirghizistan muawin tashqi ishlar ministiri ezizbék madamarow qazaqistanning bishkekte turushluq bash elchisi rapil josibayéwni ministirliqqa chaqirip, muzikant rozaxonowning qoyup bérilishi üchün nota tapshurghan idi.

qazaqistanning gherbide 2-yanwar (2022) suyuqlandurulghan gaz bahasining östürülüshi we dölettiki ijtimaiy, iqtisadiy weziyetning nacharliship ketkenlikini seweb qilip bashlanghan namayishlar, bashqa jaylarghimu kéngeydi.

kochilardiki namayishlarda, xewpsizlik tarmaqliri bilen namayishchilar otturisida toqunushlar yüz berdi. bolupmu, almuta shehiride xewpsizlik tarmaqliri saqchi we herbiy aptomobillargha ot qoyup, hökümet binalirigha kirgen namayishchilarni awaz bombisi étip tarqatti.

qazaqistan pirézidénti qasim jömert toqayéw partlighan namayishlargha hökümetning mesul ikenlikini bildürüp, hökümetning istépasini qobul qildi.

namayishlarning bezi rayonlargha kéngiyishi bilen, paytext nursultan, almuta shehiri we mangistaw ishtatlirida jiddiy halet élan qilindi.

arqidin uzun ötmey, jiddiy halet qazaqistanning bashqa rayonliridimu élan qilindi.

toqayéw 7-yanwar döletning barliq rayonlirida jemiyet tertipining qaytidin ornitilghanliqini bildürüp: «térroristlar hazirghiche qoral bilen puqralarning mal-mülüklirige dawamliq ziyan salmaqta» dégen idi.