eziz sanjar türk dunyasini asasiy bilimlerge meblegh sélishqa chaqirdi
nobél mukapatigha érishken türk alim eziz sanjar türk dunyasining toluq musteqilliq we heq-hoquqini qoghdiyalaydighan sewiyege yétishi üchün asasiy bilimlerge meblegh sélishi lazimliqini éytti.
türkiye awazi radiyosi xewiri: nobél mukapatigha érishken türk alim piroféssor doktor eziz sanjar türk dunyasigha xitab qilip: «bayliqlirimiz bar, adem küchimiz bar, chong yoshurun küchimiz bar. küchimizni asasiy bilimlerge qaratsaqla bolidu. balilirimizni tejribe ilimige adetlendüreyli» dédi.
ezerbeyjan döletlik iqtisad uniwérstéti ötküzgen iqtisad munbirigha qatnishish üchün bakugha yétip barghan eziz sanjar, tünügün (2021-yili 6-dékabir) axbarat élan qilish yighini uyushturdi.
u 2020-yili ezerbeyjanning ishghal astidiki zéminlirini azad qilish üchün bashlighan 44 künlük urushni kéche-kündüz közetkenlikini eskertip: «qarabagh zepiri türkiyening azadliq urushidin kéyinki türk dunyasining eng chong zepiridur» dédi.
u yéqinqi besh yildin buyan türk dunyasini ziyaret qiliwatqanliqini we bashqurghuchilargha asasiy bilimlerge meblegh sélishni tewsiye qiliwatqanliqini bildürdi.
u mundaq dédi:
«toluq musteqilliq we heq-hoquqimizni qoghdiyalaydighan sewiyege yétishni arzu qilsaq, asasiy bilimlerge meblegh sélishimiz lazim. men bir türk milletchisi. türk milletchilikining bir teripide bilimde küchlük bolushmu bar. bilimde küchlük bolmisaq, sirtqi küchlerge teng kélelmeymiz. uchquchisiz hawa apparatlirimizning asasida bilim bar. bayliqlirimiz bar, adem küchimiz bar, chong yoshurun küchimiz bar. biz küchimizni asasiy bilimge qaratsaqla bolidu. balilirimizni tejribe ilimige adetlendüreyli» dédi.
