өзбекстан түркпаға әза болиду

түркийә авази радийоси хәвири: өзбекстанни зийарәт қиливатқан қазақистан, қирғизистан вә түркийә парламент әзалиридин тәшкилләнгән түркпа һәйитигә башчилиқ қилған адаләт вә тәрәққийат партийәсиниң истанбул парламент әзаси исмәт учма вә униң һәмраһлиқидики һәйәт, өзбекстан кеңәш палатасиниң биринчи муавин башлиқи садиқ сафайев билән көрүшти.

көрүшүштә, түрк кеңишигә әза дөләтләр билән өзбекстан оттурисидики мунасивәтләрниң әһвали вә өзбекстан парламенти һәмдә түркпа оттурисидики һәмкарлиқларни тәрәққий қилдурушқа мунасивәтлик мәсилиләр музакирә қилинди.

түркпа һәйитигә башчилиқ қилған исмәт учма өзбекстанниң бурунқиға охшаш, күнимиздиму түрк дунйасида алаһидә орунға игә икәнликини әскәртип, түркпаниң өзбекстан билән һәр саһә бойичә мунасивәтлирини тәрәққий қилдурушни халайдиғанлиқини тәкитлиди.

өзбекстан кеңәш палатасиниң биринчи муавин башлиқи садиқ сафайев өзбекстанниңму түрк кеңиши билән мунасивәтлирини тәрәққий қилдурушқа алаһидә әһмийәт беридиғанлиқини әскәртип, бу рамкида өзбекстан парламентиниң түркпа билән мунасивәтлирини техиму тәрәққий қилдуруш нийити барлиқини қәйт қилди.

у өзбекстанниң кейинки мәзгилдә түркпаға әза болушни пилан қиливатқанлиқини билдүрүп: «өзбекстан түркпаға әза болуш тоғрисида қарар алди» деди.