qirghizistan-tajikstan chégrasida qanliq toqunush chiqti
qirghizistan-tajikstan chégrasida su teminlesh ambirini kontrol qilish sewebidin chiqqan qoralliq toqunushta, her ikki tereptin bolup jemiy alte kishi jénidin ayrildi, 115 kishi yarilandi.
türkiye awazi radiyosi xewiri: qirghizistan taratquliri qirghizistan-tajikstan chégrasida yüz bergen toqunush jeryanida qirghizistanliq üch kishining jénidin ayrilghanliqini, 84 kishining yarilanghanliqini xewer qildi.
tajikstan taratqulirida bolsa, toqunushta tajikstanliq üch kishining jénidin ayrilghanliqini, 31 kishining yarilanghanliqini xewer qildi.
rusiyege yétip kelgen qirghizistan bash ministiri ulubék maripow we tajikstan bash ministiri kohir rasulzade körüshüp, chégradiki toqunushning muzakire yoli bilen baldurraq hel qilinishi üchün teyyar ikenliklirini bildürdi.
qirghizistan taratquliri qirghizistan-tajikstan chégrasidiki toqunush awazlirining shu yer waqti 23 tin 45 minut ötkende toxtighanliqini xewer qildi.
qirghizistan we tajikstan tashqi ishlar ministirliri shu yer waqti 20:00 din bashlap rayonda pütünley urush toxtitish we herbiy qisimlarning özlirining yerlirige chékinishi mesiliside kélishim hasil qildi.
qirghizistan-tajikstan chégrasigha jaylashqan su menbelirini kontrol qilish mesiliside 28-aprél (2021) yüz bergen ixtilap, 29-aprél ikki dölet xelqining bir-birige tash étishi bilen dawamlashti. ikki dölet chégra qoghdash qisimlirining weqege arilishishi bilen toqunushqa aylandi we her ikki terep chégragha esker yötkeshke bashlidi. toqunush yüz bergen jaygha yéqin yézilarda balilar we ayallar tarqaqlashturuldi.
taratqulardiki widéolarda, qaysi terepke tewe ikenliki éniq bolmighan nurghun öylerge ot qoyup bérilgenliki körülmekte.
