qirghizistan-tajikstan chégrasida jénidin ayrilghanlarning sani ashti

türkiye awazi radiyosi xewiri: qirghizistan-tajikstan chégrasidiki toqunush, charshenbe (2021-yili 28-aprél) küni bir su menbesige közitish kamérasi ornitilishi bilen bashlighan idi.

ikki döletning tashqi ishlar ministirliri körüshkendin kéyin, 29-aprél shu yer waqti 20:00 din bashlap rayonda pütünley toqunushni toxtitish we herbiy qisimlarning burunqi jaylirigha chékinishi toghrisida kélishim hasil qilghan bolsimu, emma toqunushlar dawam qildi.

qirghizistan toqunushta jénidin ayrilghanlar sanini élan qildi. qirghizistan sehiye ministirliqi qoralliq toqunushta jénidin ayrilghan qirghizlar sanining 31 ge chiqqanliqini, yarilanghan 134 kishidin 49 ining bishkektiki doxturxanilarda yatquzulghanliqini élan qildi.

tajikstan terepning qoralliq toqunushta jéndin ayrilghanlar heqqide élan qilghan melumati hazirche éniq emes. emma, taratqularda sekkiz tajikning jéndin ayrilghanliqi, 90 din artuq kishining yarilanghanliqi qeyt qilinmaqta.

tajikstan xewerliride, weqe yüz bergen chorkuh yézisida yashaydighan 100 ge yéqin ayal we balilarning isfara shehirige tarqaqlashturulghanliqi bildürüldi.

qirghizistan pirézidénti sadir japparow twitétrda bayanat élan qilip: «qirghizistan xelqini, hemmidin awal siyasiy küchler we taratqularni özini bésiwélishqa, ighwagerchiliklerge boyun egmeslikke, düshmenlik we ixtilap peyda qilmasliqqa chaqirimen» dédi.

rayondiki 800 ge yéqin qirghizistan puqrasining bixeter rayongha tarqaqlashturulghanliqi bildürüldi.

bu jeryanda, qirghizistan pirézidénti sadir japparow bilen tajikstan pirézidénti imameli raxmanow bilen téléfonda körüshüp,  may éyining axirida tajikstan paytexti düshenbide uchrishish toghrisida kélishti. buningdin bashqa, hökümetler ara chégra belgilesh heyetlirining 1-mayda qirghizistanning batken rayonida uchrishishi toghrisidimu kélishim hasil qildi.