sadir japparow pirézidéntliq hoquqini tapshuruwaldi

türkiye awazi radiyosi xewiri: qirghizistanda 10-yanwar (2021) ötküzülgen pirézidéntliq saylimida %79.20 awazgha ériship pirézidéntliqqa saylanghan sadir japparow üchün bishkekte uyushturulghan qesem bérip wezipe tapshuruwélish murasimigha, mingdin artuq kishi qatnashti. murasimgha, 2020-yili 5-15-öktebir künliri yüz bergen namayishlardin kéyin, pirézidéntliq hoquqidin istépa bergen soronbay jeinbékowmu qedem teshrip qildi.

sadir japparow murasimda, merkiziy saylam komitétining bashliqi nurjan shaildabékowdin pirézidéntliq guwahnamisini tapshuruwaldi we ong qolini asasiy qanungha qoyup qesem qildi.

u dölet marshi oqulghandin kéyin: «ikki ming yildin artuq tarixiy ötmüshi bar xelqning aldida katta mesuliyetni hés qiliwatimen» dédi.

u 2020-yili 5-öktebir yüz bergen namayishlarning parlamént saylimining netijisini we pirézidént bilen hökümetning istépasini meydangha keltürgenlikini bildürüp: «qalaymiqanchiliq we qanunsizliqning bosughisigha kélip qalghan dölette, milliy ittipaqliq we tinchliqni qoghdash üchün xelqimiz bilen mesuliyetni üstimizge alduq. weziyetni muqimliqqa ige qilishta muweppeqiyet qazanduq» dédi.

u rusiyege qirghizistanning qiyinchiliq künliride yardem qilghanliqi sewebidin teshekkür éytti we qoshna özbékstan hemde qazaqistan bilen ortaq teqdirge ige ikenliklirini eskertti.

u türkiye bilen özara hemkarliqlarni, istratégiyelik hemkarliqlar bilen iqtisadiy we medeniyet munasiwetlirini kücheytishni xalaydighanliqlirini bildürdi.

u köp tereplimilik tashqi siyaset yürgüzidighanliqlirini tekitlep, ottura asiya döletlirini öz ichige alghan halda, xitay, amérika we yawropa ittipaqi döletliri bilen hemkarliq üchün tirishchanliq körsitidighanliqlirini qeyt qildi.