қазақистан латин елипбәсигә өтүштә түркийәни үлгә қилиду

түркийә авази радийоси хәвири: җәнубий қазақистан өлкиси валийси җансейит туймәбайев қазақистанниң латин елипбәсигә өтүштә түркийәни үлгә қилидиғанлиқини ейтти.

валий җансейит туймәбайев мәркизи учур - алақә хизмәт бинасида чақирған җәнубий қазақистан өлкисиниң иҗтимаий вә иқтисадий әһвали һәққидики ахбарат елан қилиш йиғинида, қазақистанниң латин елипбәсигә өтүшигә даир соалға җаваб берип, «биз латин елипбәсигә өтмәймиз, бәлки латин елипбәсигә қайтмақчимиз» деди.

җансейит туймәбайев барлиқ түркий дөләтләрниң 1929 – йилидин 1940 – йиллириғичә болған җәрйанда латин елипбәси ишләткәнликини әслитип, түркийә билән қазақистанниң охшаш мәзгилдә латин елипбәсини ишлитишкә башлиғанлиқини, бирақ совит иттипақи рәһбири җосеф ситалинниң бир күн ичидила латин елипбәсини кирил елипбәсигә айландуривәткәнликини ейтти.

туймәбайев: «түркийә 1928 – йилидин буйан латин елипбәсини ғәлибилик ишлитиватиду. шуңа биз түркийәни вә түрк тилини үлгә қилимиз. түркийәниң латин елипбәсини нәқәдәр нәтиҗилик ишләткәнликини вә һечқандақ қийинчилиққа учримиғанлиқини билимиз. бу иш бизгә нисбәтәнму қийин болмайду» деди.

валий җансейит туймәбайев йиғинда анадолу агентлиқи мухбири тәрипидин соралған түркийә карханичилириниң җәнубий қазақистандики селинмилириға даир соалиға җаваб берип, түркийәниң учқандәк тәрәққий қилған бир дөләт икәнликини вә һазир түркийәдә йүз миңлиған ширкәтләрниң паалийәт қиливатқанлиқини билдүрди.

туймәбайев илгири қазақистанниң әнқәрәдә турушлуқ баш әлчилик вәзиписини өтигәнликини әскәртип, «түркийә ширкәтлирини мәмликитимизгә тәклип қилимиз. қазақистанда сода – санаәт мунбири йиғини чақирип кеиливатимиз. түнҗи нөвәтлик мунбәр йиғинимизға 100 нәпәр түркийәлик сода – санаәтчи қатнашқан иди. түрк карханичилар 15 – 20 кишилик һәйәт шәклидә һәрдаим өлкилиримизни зийарәт қилип, мәбләғ селиш имканийәтлирини тәкшүрүп турмақта» деди.

туймәбайев мәбләғ селиш үчүн барлиқ қануний асасларниң һули селинғанлиқини вә түркийә карханичилириниң районда актип паалийәт қиливатқанлиқини ейтти.

җәнубий қазақистанда түркийә карханичилириниң бинакарлиқ, қурулуш әслиһәлири ишләпчиқириш, парник қуруш қатарлиқ саһәләрдә актип паалийәт қиливатқанлиқини тәкитләп, районда 10 дин артуқ түркийә ширкити барлиқини уқтурди.