تۈركىيە نېفىتقا ئالاقىدار نىشانىغا يۇقىرى يۆنىلىشلىك ئۆزگەرتىش كىرگۈزدى

تۈركىيە ئاۋازى رادىيوسى: تۈركىيە جۇمھۇرىيەت تارىخىدىكى نېفىت ئىشلەپچىقىرىش رېكورتىنى بۇزدى. كۈندىلىك ئىشلەپچىقىرىش مىقدارى 100 مىڭ ۋارىلدىن ئېشىپ كەتتى؛ بۇ مۇساپىدە گاباردا بايقالغان نېفىت ناھايىتى مۇھىم رول ئوينىدى. شېھىت ئايبۈكە يالچىن ۋە شېھىت ئەسما چەۋىك نېفىتلىكىنىڭ كۈندىلىك ئىشلەپچىقىرىش مىقدارى 40 مىڭ ۋارىلدىن ئېشىپ كەتتى. شۇنداق قىلىپ، تۈركىيە بۇ يىل ئۈچىنچى ئاي توشۇشتىن بۇرۇن 2024-يىللىق نېفىت ئىشلەپچىقىرىش نىشانىغا يەتتى. تۈركىيەنىڭ 2024 – يىللىق يېڭى نىشانى ئالدى بىلەن 150 مىڭ ۋارىلغا، ئاندىن 200 مىڭ ۋارىلغا يېتىش.

تۈركىيە نېفىت ھەسسىدارچىلىق شىركىتىنىڭ مۆلچەرىچە، شېھىت ئايبۈكە يالچىن نېفىتلىكىدىكى يېڭى بايقالغان ئومۇمىي نېفىت زاپىسى تەخمىنەن 1 مىليارد ۋارىل، ئىشلەپچىقىرىشقا بولىدىغان  نېفىت زاپىسى تەخمىنەن 600 مىليون ۋارىل ئىكەن.

گەرچە شىرناق ئىشلەپچىقىرىشتا مۇھىم ئورۇنغا ئىگە بولسىمۇ، ئەمما مەزكۇر نېفىتلىكلەرنىڭ قىسقا مۇددەت ئىچىدە كېڭەيتىلىشى كۈتۈلمەكتە؛ ئالدى بىلەن، ھاككارى ۋە ۋاندا ناھايىتى قىسقا ۋاقىت ئىچىدە يېڭى بۇرغىلاش پائالىيەتلىرى باشلىنىدۇ. شېھىت كەنجى لېيتېنانت ئىسمائىل جان ئاقدېڭىز رايونىدا زور مىقداردا نېفىت زاپىسى بارلىقى مۆلچەرلەنمەكتە. بۇرغىلاشلارنىڭ 2500 مېتىر بىلەن 4500 مېتىر چوڭقۇرلۇقلىرىغا مەركەزلىشىدىغانلىقى تەكىتلەنمەكتە.

ئۇزۇن مۇددەتتىن قارىغاندا، 14 ۋىلايەتتىكى 18 جايدا نېفىت چارلاش پائالىيىتى باشلىنىدۇ؛ بۇ ۋىلايەتلەر تەرتىپى بويىچە ۋان، ھاككارى، غازىئانتەپ، ئانتاليا، چاناققەلئە، شانلىئۇرفا، زونگۇلداق، دىيارباكىر، بارتىن، قارابۈك، كاستامونۇ، ئەلازىغ، ئەدىرنە، قەھرىمانماراش ۋە كىلىس قاتارلىقلار.

نېفىت ئىشلەپچىقىرىش مىقدارىنىڭ ئېشىشىغا ئەگىشىپ، تۈركىيەنىڭ دەسلەپتە نېفىت ئېھتىياجىنىڭ %20نى يەرلىك مەنبەلەردىن قاندۇرۇشى، بۇنىڭ نۆۋەتتىكى ھېسابات قىزىل رەقىمىگە خاتىمە بېرىشتىكى ئىنتايىن ئىجابىي قەدەم بولىدىغانلىقى تەكىتلەنمەكتە. ئوتتۇرىغا قويۇلۇشىچە، بۇ يېڭى بايقاشلارنىڭ تۈركىيە ئىقتىسادىغا قوشىدىغان تۆھپىسى 3 مىليارد دوللاردىن ئاشىدىكەن.

گابارغا نېفىت تۇرۇبا لىنىيەسى ياتقۇزۇلماقتا...

تۈركىيە نۆۋەتتە رايوندىكى  نېفىتنى قۇرۇقلۇق ئارقىلىق توشۇۋاتقان بولسىمۇ، لېكىن، گابار ۋە رايوندىكى باشقا نېفىتلىكلەردىن چىقىرىلغان نېفىتلەرنى ئاساسىي لىنىيەگە توشۇش ئۈچۈن تۇرۇبا ياتقۇزۇش خىزمەتلىرىنى جىددىي شەكىلدە داۋاملاشتۇرماقتا.

گاباردىن «بوتاش»نىڭ ئىدىل بېكىتىگىچە سوزۇلىدىغان خام نېفىت تۇرۇبا يولى قۇرۇلۇشىنىڭ يېرىمغا يېقىنى ئاللىقاچان تاماملاندى. مەزكۇر نېفىت ئىدىل بېكىتىدىن جەيھان ۋە دۆرتيول ئىستانسىلىرىغا يەتكۈزۈلىدۇ. بۇ ئارقىلىق نېفىتنىڭ تېخىمۇ قولاي ئېكسپورت قىلىنىشىنىڭ يولى ئېچىلىدۇ. ئەلۋەتتە، تۈركىيەنىڭ نېفىت ساھەسىدىكى نىشانلىرى قۇرۇقلۇقتىكى ئ نېفىتلىكلەر بىلەنلا چەكلەنمەيدۇ.

تۈركىيەنىڭ تۆت بۇرغىلاش پاراخوتى دېڭىزلاردىكى چارلاش پائالىيەتلىرىنى ئۈزلۈكسىز داۋاملاتۇرماقتا. فاتىھ، ياۋۇز ۋە قانۇنى قاتارلىق ئۈچ بۇرغىلاش پاراخوتى قارا دېڭىزدا، ئابدۇلھەمىدخان بۇرغىلاش پاراخوتى بولسا، ئاقدېڭىزدا چارلاش ۋە بۇرغىلاش پائالىيەتلىرىنى ئېلىپ بارماقتا.