антакйа күнәфәси

түркийә авази радийоси: илкәр ташқин тәрипидин тәййарланған «түркийәниң районларға асасән тизимға елинған мәһсулатлири» намлиқ сәһипимизниң бу һәптилик санида, «антакйа күнәфәси» ни тонуштуримиз.

антакйа күнәфәсиниң тизимлитиш вақти: 14.04.2006

 түркийәниң ақдеңиздики саһил шәһәрлиридин бири болған хатайниң антакйа наһийәси өзиниң исми билән аталған алаһидә татлиқ түрүм билән мәшһур. 2006 - йили антакйа сода-санаәтчиләр бирләшмисиниң илтимаси билән түркийәниң районларға хас тизимға елинған мәһсулатлири қатариға киргүзүлгән антакйа күнәфәси үчүн түркийәдә ишләпчиқирилидиған пишлақ, сериқ май вә шәрбәт ишлитилиду. бу татлиқ түрүм чоң вә йумилақ тәхсигә икки қәвәт сим кадайиф арисида күнәфә пишлиқини пишуруп, көңүлдикидәк татлиқ шәрбитини илавә қилиш арқилиқ тәййарлиниду. тәхсиниң чоң -кичиклики истемал қилинидиған киши саниға асасән охшаш болмайду. антакйа күнәфәсиниң қелинлиқи тәхминән 2-1 сантиметир келиду. қизиқ йейилидиған бу татлиқ түрүм истемал қилиниш җәрйанида, ичидики пишлақниң талалинип созулуши күтилиду. ишлитилгән тузсиз пишлақниң сақлаш муддити 2-3 күн болғачқа, ишләпчиқириш җәрйанида чоқум йеңи пишлақ болуши шәрт. кона пишлақ антакйа күнәфәсиниң тәминиң бузулушиға сәвәб болиду. антакйа күнәфәси түркийәдә ишләпчиқирилидиған башқа пишлақлиқ татлиқ түрүмләрдин шәкли, рәңги, тәркиби, тәййарлиқи вә истемал усули җәһәттәпәрқлиқ болиду. башқа пишлақлиқ татлиқ түрүмлиригә охшимайдиған тәрипи, антакйа күнәфәсиниң үсти вә асти йүзи айрим -айрим пишурулиду. бу алаһидә устилиқ тәләп қилидиған бир җәрйан. татлиқ һалға кәлтүрүш җәрйани, күнәфә пешурулғандин кейин, шәрбәт қошуш арқилиқ елип берилиду. бу татлиқ түрүм омумән үстигә пистә чечип, қаймақ йаки марожна билән биргә сунулиду.