дүзҗәниң непиз нанлиқ (йуфка) қонуралп полуси

түркийә авази радийоси: түркийәниң қара деңиз қирғиқиға җайлашқан дүзҗә шәһиридә алаһидә күнләрдә пишурулидиған бир хил полу бар. өтмүши османли империйәсигичә тутишидиған «непиз нанлиқ қонуралп полуси» дүзҗә вилайәтлик деһқанчилиқ вә орманчилиқ идарисиниң илтимасиға асасән, 2021-йили түркийәниң җуғрапийәлик көрсәткүч берилгән мәһсулатлири қатариға киргүзүлди. болупму той, мубарәк кечиләр дегәндәк алаһидә йиғилишларда меһманларға сунулидиған непиз нанлиқ қонуралп полусини тәййарлаш маһарәт тәләп қилиду. гүрүчни тәмләндүридиған әң муһим елемент сөңәк шорписи. полу тәййарлиништин бир кечә бурун кала гөши сөңәклири пакиз йуйулуп, соғуқ суға челиниду. андин, сөңәкләр сүзүвелинип бир қазанға селинип, таки йиликлири аҗрап чиққучә қайнитилиду. қайнитилип болғандин кейин, сүзгүчтин өткүзүлүп, шорпидики көпүк вә сөңәк парчилири еливетилиду. бу җәрйанда җуғрапийәлик көрсәткүч берилгән қонуралп гүрүчиму икки қошуқ туз селинған илман суда 1-2 саәт турғузулиду. соғуқ суда чайқиветилгән гүрүч сөңәк шорписиға нормал су қошуп қайнитилиду. азрақ қайниғандин кейин, қазанға алдин пишуруп тәййарливалған ноқут, пишуруп титилған кала гөши, туз вә қаримуч селинип қайнитилиду. су йегән гүрүч йағач қошуқ билән ичидин сиртиға қаритилип, наһайити аста арилаштурулғандин кейин дәмлиниду. дәмлиниш җәрйанида, полу қазини үстәл рәхти билән орилиду. шуниң билән бир вақитта, өйдә ечилған хемир йаки непиз качка нан илман суда һөл қилиниду, андин 30 минут әтрапида дәмләнгән гүрүч бир тәхсигә усулуп, үстигә непиз нан йейилип меһманларға сунулиду.