мәсудийә қуруқ нени

түркийә авази радийоси: түркийәниң қара деңиз қирғиқидики орду шәһириниң мәсудийә наһийәсидә алаһидә усулда пишурулидиған, мувапиқ шараитта 5 йилғичә сақлап истемал қилғили болидиған бир хил нан түри бар. райондики йайлақ мәдәнийитиниң түрткисидә барлиққа кәлгән «мәсудийә қуруқ нени» орду шәһәрлик һөкүмәтниң илтимасиға асасән, 2022-йили 11-айниң 22-күни «түркийәниң районларға асасән тизимға елинған мәһсулатлири» қатариға киргүзүлди. һалқа шәкиллик бу нанниң хемириға пәқәт буғдай уни, қуруқ ечитқу, су вә туз ишлитилиду. еғирлиқи тәхминән 150 гирам келидиған нанниң хемири 20 минутта ечитилиду вә бир аз тиндурулғандин кейин, һалқа шәклидә ечилиду. хемир һалқиси дуб йаки қариғай йағичи билән 170 гирадусқичә қизитилған таш тонурда 15 минут пишурулуп, йерим пишқан һаләттә тонурдин елиниду, совуғандин кейин йәнә 15 минут пишурулиду. бу хил усул арқилиқ нан тәләпкә уйғун қурутулиду. дийаметири 25-30 сантиметир әтрапидики нанлар пишурулуп болғандин кейин, температуриси 50 гирадусқа чүшкән тонурға қойуп, 5 саәт әтрапида қайтидин толуқ қурутулиду. тонурдин чиқирилип бир саәт соғутулидиған мәсудийә қуруқ нанлири, һава өтүшмәйдиған шәкилдә болақлинип, сетилиду. мәсудийә қуруқ нанлирини салқин вә қурғақ муһитта тәхминән 5 йил сақлиғили болиду.