түркийә һәмкарлиқ вә кординатсийә агентлиқи-тиканиң паалийәтлири

«түркийәниң көңүл көврүклири»намлиқ бу пирограммимизда икки һәптидин буйан түркийә һәмкарлиқ вә кординатсийә агентлиқи-тика тоғрулуқ бәзи мәлуматларни сиз қиммәтлик радийо аңлиғучи достлиримиз билән ортақлишип келиватимиз, өткән һәптә тиканиң чәт әлдики йардәм паалийәтлири тоғрулуқ азрақ тохталғанидуқ, бүгүн бу қиммәтлик оргинимизниң чәт әлдики муһим паалийәтлирини тонуштурушни давамлаштуримиз.

һазирғичә маарип саһәси болуп нурғун саһәдә тәхминән 4250 лайиһә ройапқа чиқарған түркийә һәмкарлиқ вә кординатсийә агентлиқи-тика коломбийә, пәләстин, нигер, македонийә, албанийә, афғанистан  болуп нурғун дөләттә билим йуртлири қурди. болупму йеқинқи 5 йил ичидә 1000дин артуқ мәктәп бәрпа  қилип чиқти. тика намратлиқни азайтиш, йезиларни тәрәққий қилдуруш вә айалларға иш пурсити йаритип бериш, йемәк-ичмәк бихәтәрликини капаләткә игә қилиш, намратларни йөләш қатарлиқларға алаһидә әһмийәт бериш билән биргә, йеза-игилик вә чарвичилиқ саһәлиридиму муһим лайиһәләрни вуҗудқа чиқарди. африқа қитәсиниң қурғақлишип кетишиниң алдини елиш, африқа дөләтлиридики байлиқлардин йәрлик хәлқләрниң пайдилиниши үчүн шараит йаритип бериш мәқситидә сомалиниң пайтәхти моқдишуда қурулған йеза-игилик мәктипи, күнимиздә районға заманиви йеза-игилик техникилирини тонуштуридиған пакултитқа айланди.

балқан районидики нурғун дөләттә  йеза-игиликни тәрәққий қилдурушқа мунасивәтлик нурғун лайиһә ройапқа чиқарған тика, намрат аилиләр вә кичик типлиқ карханчиларниң киримлирини ашурушни мәқсәт қилған һалда паалийәт елип бармақта.  тика әһмийәт бериватқан йәнә бир паалийәт саһәси болса охшимиған саһәләрдә кәспий маарип хизмәтлири елип бериш  арқилиқ заманиви ишләпчиқириш базилири бәрпа қилиштур. ғәззәдә тика тәрипидин қурулған абасан зәйтун йеғи ишләпчиқириш завути районда иш пурсити йаритиш вә иқтисадини гүлләндүрүш нуқтисидин типик өрнәк һесаблиниду. 2017-йилдин башлап бу завутта 3100 ғәззәлик деһқан ишқа орунлашти. 2016-йили бу завутта 5000 тонна зәйтун йеғи ишләпчиқирилди,ғәззәдики абасан йәрлик һөкүмити бир тонна зәйтун йеғидин тәхминән 100 доллар сап кирим қилиду.

түркийә һәмкарлиқ вә кординатсийә агентлиқи-тиканиң түркийәчә алаһидиликкә игә тәрәққийат йардәм әндизиси башқа тәрәққийат йәрдәм әндизилиридин алаһидә пәрқлинип туриду. мәзкур тәрәққийат йардәм әндизисиниң мундақ пиринсипаллиқ алаһидилики бар: шәртсиз, сәммийәт, сүзүклүк, инсанни мәркәзлик қилиш, мәсулийәт, өз-ара өгиниш, тәләпни асас қилиш, әмәлий чарә тепиштин ибарәт.