ғәззәдә өлтүрүлгән б д т хадимлириниң сани 189 ға йәтти

түркийә авази радийоси хәвири: бирләшкән дөләтләр тәшкилати йеқин шәрқтики пәләстин мусапирлириға йардәм бериш вә мулазимәт оргини ғәззә райониниң нөвәттики вәзийити һәққидә доклат елан қилди.

исраилийәниң һуҗумлириниң миңларчә пуқраниң өлүп кетиши, пәләстинликләрниң өй – маканлиридин айрилип қелишиға сәвәб болуватқанлиқи вә пәләстинниң ул әслиһәләргә зийан йәткүзүватқанлиқи қәйт қилинған байанатта тәкитлинишичә,  исраилийә армийәси ғәззә шәһири, җәнубтики рәфаһ шәһириниң шәрқий қисми, рәфаһ вә кәрәм әбу салим чегра еғизлириға қуруқлуқтин давамлиқ һуҗум қилмақта икән.

исраилийә армийәсиниң 2023 – йили 7 – өктәбирдин буйан давамлаштуруватқан һуҗумлирида өлтүрүлгән бирләшкән дөләтләр тәшкилати йеқин шәрқтики пәләстин мусапирлириға йардәм бериш вә мулазимәт оргини хадимлириниң сани 189 ға йәткән.

 бирләшкән дөләтләр тәшкилати инсанпәрвәрлик ишлирини маслаштуруш ишханисиниң санлиқ мәлуматлири нәқил кәлтүрүлгән доклатта қәйт қилинишичә, еһтийаҗ күнсери ешиватқан болсиму, инсанпәрвәрлик йардәм тәшкилатлири ғәззәниң шималини өз ичигә алған районлардики мудапиәсиз һаләттики кишиләрни зийарәт қилишта давамлиқ тосқунлуққа учримақта икән.

исраилийә даирилири 1-майдин 9-майғичә ғәззәниң шималий үчүн пиланланған 32 инсанпәрвәрлик йардими хизмитиниң пәқәт 9 инила қолайлаштурған, 5 инсанпәрвәрлик йардими һәрикитини биваситә рәт қилған, 11 игә тосқунлуқ қилған, 7 си арқа сәптики тосалғулар сәвәбидин әмәлдин қалдурулған.

доклатта, исраилийә даирилири охшаш мәзгилләрдә ғәззәниң җәнубидики һәмкарлишиш зөрүр болған районларда 46 инсанпәрвәрлик йардәм хизмитиниң 25 ини қолайлаштурғанлиқи , 9 ни рәт қилғанлиқи, 3 ни тосқанлиқи вә әшйа обороти мәсилиси сәвәбидин 9 ни әмәлдин қалдурғанлиқи тәкитлинип мундақ дейилгән:

«исраилийәниң рәфаһ районидики һәрбий һәрикити инсанпәрвәрлик йардәм тәшкилатлириниң ғәззәгә муһим инсанпәрвәрлик йардәм буйумлирини йәткүзүшигә биваситә сәлбий тәсир көрсәтмәктә.»