гирузийәдә наразилиққа сәвәб болған қанун тәклипи мақулланди
гирузийә парламенти һакимийәт бешидики гирузийә арзуси партийәси сунған «чәт әл тәсириниң очуқ-ашкара болуши» қанун тәклип лайиһәсини тәстиқлиди.
түркийә авази радийоси хәвири: гирузийә парламентида, биринчи тәстиқини 17-апрел (2024), иккинчи тәстиқини 1-май алған вә тәхминән бир айдин буйан наразилиқ билдүрүлүватқан «чәт әл тәсириниң очуқ-ашкара болуши» қанун тәклип лайиһәсигә, үчинчи шундақла әң ахирқи қетим аваз ташланди. қанун тәклип лайиһәси 30 ға қарши 83 авазниң қоллиши билән тәстиқланған болди. һәптиләрдин буйан наразилиқ намайишлириға сәвәб болған қанун тәклип лайиһәсиниң рәсмий қанунға айлиниши үчүн, парламентта үч қетим авазға қойулуши керәк иди.
қанун тәклип лайиһәси авазға қойулуватқан вақитта, бәзи парламент әзалири оттурисида қаттиқ муназирә, һәтта җедәл чиқти. намайишчилар «рус қануни» дәп атап наразилиқ билдүргән қанун тәклипи, пирезидент саломе зурабишвилиға имзалиши үчүн әвәтилиду.
гирузийә пирезиденти саломе зурабишвили елан қилған байанатлирида, қанун тәклипигә қарши икәнликини вә парламент қобул қилған әһвалда өзиниң рәт қилидиғанлиқини билдүргән иди.
пирезидент саломе зурабишвили рәт қилған әһвалда, қанун тәклипи икки һәптә ичидә парламентқа қайта әвәтилиши керәк. һакимийәт бешидики партийә парламентта пирезидентниң рәт қилиш һоқуқидин өтүп кетидиған дәриҗидә көп орунға игә.
қанун тәклипи авазға қойулуватқан вақитта, парламентниң әтрапида намайишлар давам қилди. бәзи намайишчилар аваз нәтиҗиси елан қилинғанда парламентқа бесип киришкә урунди. сақчиларниң тосуши нәтиҗисидә, икки тәрәп оттурисида сүркилишләр йүз бәрди, бәзи намайишчилар тутулди.
мәзкур қанун тәклип лайиһәсидә, гирузийәдә қурулған мәблиғиниң %20 и чәт әлләрниң йардими игәлләйдиған фондларниң «чәт әл күчиниң мәнпәәтини чиқиш қилидиған тәшкилат» дәп тизимға елишни, ундақ болмиғанда, җәриманә қойуш؛ фондларни тизимға елиш рәсмийәтлиригә гирузийә әдлийә министирлиқиниң мәсул болуши тәләп қилиниду.
