белорусийә пирезиденти александир лукашенко: «нато бизни урушқа сөрәп кирмәкчи»
белорусийә пирезиденти александир лукашенко шималий атлантик әһди тәшкилатиниң һәрбий күчини белорусийәниң ғәрбий чеграсиға мәркәзләштүргәнликини билдүрүп, «бизни урушқа сөрәп кирмәкчи» деди.
түркийә авази радийоси хәвири: пирезидент лукашенко асасий қанунға түзитиш киргүзүш арқилиқ әң йуқири вәкиллик оргиниға айланған белорусийә хәлқ мәҗлисидә нутуқ сөзлиди.
лукашенко шималий атлантик әһди тәшкилатиниң һәрбий күчини белорусийәниң ғәрбий чеграсидики полша вә балтиқ деңизи дөләтлиригә мәркәзләштүргәнликини вә шималий атлантик әһди тәшкилатиниң истратегийәлик йадро қораллирини заманивилаштурушни давамлаштуриватқанлиқини, буниңға қарита өзлириниңму охшаш иқтидарға игә қоралларни базиларға орунлаштурғанлиқини әскәртти.
лукашенко: «бир нәрсә ениқ, улар бизни һәқиқәтән урушқа сөрәп киришни халайду. баш қомандан болуш сүпитим билән мәнму, армийәмизму вә алаһидә әтрәтлиримизму буни көрмәктә. улар бизни қутритип, хәндәк колаватиду. һәрбий ул әслиһәлири вә қораллирини заманивилаштуруватиду. биз чеграниң йәнә бир тәрипидә тинч турмуш бәрпа қиливатимиз, хәндәк колимайватимиз. әмма бизниң тинчлиқни сөйүшимиз пассиплуқ әмәс. бу арилаштуруп қойулмисун» деди.
лукашенко тәһдитләрниң күчийишигә әгишип белорусийәниң симметрик тәдбирләрни қоллинидиғанлиқини вә җәң қилиш күчини ашуридиғанлиқини тәкитлди вә: «бизни симметрик болмиған тәдбир қоллинишқа мәҗбурлимаңлар» дәп агаһландурушта болди.
