һамас сийасий бейруси башлиқи исмаил һәниййә әрдоғанни мәдһийәлиди

түркийә авази радийоси хәвири: һамас сийасий бейруси башлиқи исмаил һәниййә, «(җумһур рәис рәҗәп таййип) әрдоғанниң пәләстин мәсилиси тоғрисидики байанати, пәләстинни өзлириниң дәваси дәп қарайдиған вә ғәззәдики зулумға қарши турған барлиқ түркийә хәлқиниң виҗданини әкис әттүрүп бәрди» деди.

һәниййә әрдоғанниң пәләстин дәвасиға қилған йардәмлирини мәдһийәләп: «җумһур рәис әрдоғанниң шундақла адаләт вә тәрәққийат партийәсиниң парламент гуруппа йиғинида елан қилған байанати, һамасни миллий азадлиқ һәрикити дәп изаһлиған һәмдә уни <қувваий миллийә> (йәни түркийәниң азадлиқ һәрикити тәшкилати) ға охшатқан ениқлимиси, шүбһисизки бизгә нисбәтән вә пәләстин хәлқигә нисбәтән иптихарлиниш мәнбәсидур. түркийәниң райондики орни, район характерлиқ вә хәлқаралиқ сийасити, пәләстин дәвасиға вә ғәззәгә қаратқан позитсийәсини йеқиндин көзәтмәктимиз. түркийә хәлқиниң ғәззәдики қоршавни бикар қилиш үчүн мави мармара парахотида қандақ шеһит қилинғанлиқи вә қандақ қурбанлиқларни бәргәнлики һазирму есимиздә» деди.

әрдоған билән өткүзгән учришишта исраилийәгә қаратқан сода чәклимисиниңму музакирә қилинғанлиқини әскәрткән һәниййә, бу қарарниң мусулманларниң муқәддәс маканлирини, болупму әләқса мәсҗиди вә қуддустики муқәддәс җайларни айақ асти қилған зионист дүшмәнләргә қарши сәл қариғили болмайдиған муһим бир қәдәм икәнликини тәкитлиди.

исмаил һәниййә җумһур рәис әрдоған вә түркийә хәлқиниң пәләстин дәвасиға қарита пикрий, тарихий вә сийасий позитсийәсигә мәдһийә оқуп, «биз әрдоғанниң бирләшкән дөләтләр тәшкилатида пәләстинниң хәритисини көрситип, земинимизниң қандақ ишғал қилинғанлиқини чүшәндүргәнликини вә (исраилийәниң сабиқ  президентлиридин) шимон перес қа қайтурған җавабини һелиму әсләп турмақтимиз» деди.

исмаил һәниййә ғәззәни башқурушқа мунасивәтлик бәзи таллашларниң оттуриға қойулғанлиқини, әмма буниң мувәппәқийәтлик болиши мумкин әмәсликини тилға елип, «ғәззә пәләстинликләр тәрипидин башқурулиду. һамас ғәззәни башқурушта бирдин бир сөз игиси болушта чиң турмайду. әмма биз ортақлиқ асасида бирләшмә һөкүмәт қуралаймиз вә ғәззәниң башқурилиши тоғрисида келишәләймиз.  булар миллий мәсилиләрдур,. ғәззәдә, ғәрбий қирғақта йаки һәр иккисидә нә ишғалийәтчиләрниң, нә башқиларниң вәзийәтни тәңшигүчи болишиға йол қоймаймиз» деди.

исраилийәниң рафаһқа қаратқан тәһдити тоғрисидиму тохталған исмаил һәниййә: «биз рафаһқа бесип кириштин агаһландуримиз, чүнки бу пәләстин хәлқигә қарши чоң бир қирғинчилиққа йол ечиши мумкин. биз барлиқ қериндаш дөләтләрни, мисирдики вә түркийәдики қериндашлиримизни, мурәссәчи қатардики қериндашлиримизни шундақла һәм  йавропа дөләтлирини (исраилийә) ниң таҗавузчилиқини чәкләшкә чақиримиз. һәм рафаһқа бесип киришини тосуп қилиш үчүн, һәм (исраилийә армийиси) ниң ғәззәдин толуқ чикиниши вә ғәззәгә қилиниватқан һуҗумларниң ахирилишиши үчүн һәрикәткә өтүшкә чақиримән» деди.

исмаил һәниййә һамасниң музакириләрдә еластикилиқни намайан қилғанлиқини, исраилийәниң болса, мурәссәсиз позитсийәдә болғанлилқини әскәртип, музакириләрниң үзүлүп қилишиниң вә мәғлуп болишиниң җавабкарлиқиниң (исраилийәниң) мурәссәсиз позитсийәсидә икәнликини тәкитлиди.