украина мәғлуб болуши мумкин икән

түркийә авази радийоси хәвири: америка мәркизий ахбарат идариси (CIA) ниң башлиқи вилйам бурнс украинаниң йил ахириғичә йил ахириғичә русийәгә қарши урушта мәғлуб болидиғанлиқи тоғрисида байанат елан қилди.

мәзкур байанатниң украинаға йардәм бериш пилани конгрәдә музакирә қилиниватқан бир вақитта, җо байдин һөкүмитиниң бүгүнгичә елан қилған әң қаттиқ агаһландуруш икәнлики билдүрүлди.

бурнисниң бу байанатни 20-апрел авам палатасида өткүзүлидиған аваз ташлаштин илгири елан қилиши алаһидә диққәт қозғиди.

авам палатасида авазға қойулидиған йардәм пиланиниң миқдари 94 милйард доллар. бир түркүм мутәәссип җумһурийәтчиләр украинаға йардәм қилишқа қарши чиқип, буниң орниға америка чеграсини қанунсиз көчмәнләрдин қоғдашқа әһмийәт беришни оттуриға қоймақта.

америка мәркизий ахбарат идариси илгириму конгрә йардәм пиланини мақуллимиса, украинаниң 2024-йили муһим уруш сәплирини қолдин берип қойидиғанлиқи тоғрисида агаһландурған иди.

вилйам бурнсниң бу қетимқи агаһландуруши техиму қаттиқ болуп, у украинаниң йардәмгә еришәлмигән әһвалда москваға тәслим болушқа мәҗбур қалидиғанлиқини илгири сүрди.

у мундақ деди:

«украина 2024—йилниң ахириғичә урушта мәғлуб болуши муқәрәр. пәқәт болмиди дегәндә, путин мәсилини сийасий һәл қилишта өзи үмид қилған вә мәҗбурий таңидиған шараитларға игә болидиған вәзийәт шәкиллиниши мумкин.»

бурнс «украинаниң мәғлубийити» дегәндә, зади немини көздә тутқанлиқи ениқ әмәс. с н н (CNN) мәнбәлири америка йардәм қилмиған әһвалдиму, русийә украинани пүтүнләй ишғал қилалмайду, дәп қарайду.

мутәхәссисләрниң көпинчиси, украина йардәмгә еришәлмисә москва харкив билән одессани өз ичигә алған муһим җайларни қолға киргүзүвелиши вә кейнчә 2014-йили қиримни өзигә қошувалғиниға охшаш, урушта игәлливалған җайларни қошувелиши мумкин. мана бу украинаниң «мәғлубийити» демәктә.