америка билән әнглийә иранға ембарго йүргүзиду
америка билән әнглийә, иран исираилийәгә һава һуҗуми қилғандин кейин, район муқимлиқиға зийан салғанлиқини сәвәб көрситип, иранниң йәттә пуқрасиға вә алтә оргиниға ембарго йүргүзүлидиғанлиқини елан қилди.
түркийә авази радийоси хәвири: әнглийә ташқи ишлар вазарити байанат елан қилип, иранниң 13-апрел исираилийәгә қилған һава һуҗумиға җавабән, америка билән тәң маслишип иран армийәсиниң йуқири дәриҗилик әмәлдарлириға ембарго йүргүзүшниң қарар қилинғанлиқини билдүрди.
байанатта, ембарголарниң иранниң район муқимлиқиға зийан селиш иқтидариға чәклимә қойидиғанлиқи әскәртилди.
ембарго қойулған органлар вә кишиләр арисида иран армийәсиниң баш иштаби, иран инқилабий муһапизәтчиләр деңиз қисминиң генерали вә мудапиә министири муһәммәд риза аштийанниң барлиқи қәйт қилинди.
ембарго йүргүзүлгән кишиләргә сайаһәт чәклимиси қойулидиғанлиқи, мал-мүлүклириниң тоңлитилидиғанлиқи билдүрүлди.
исраилийә 1-апрел иранниң дәмәшиқтики әлчиханисиниң консулхана бинасиға һавадин һуҗум қилип, иран инқилабий муһапизәтчилири қисимлириниң икки генералини өз ичигә алған йәттә әскирини өлтүргән. һуҗумда йәнә сүрийә пуқраси алтә кишиму җенидин айрилғаниди.
иран буниң дөләт земиниға һуҗум қилғанлиқ болидиғанлиқини вә өч алидиғанлиқини елан қилған иди. исираилийә болса, иранниң һуҗумлириға җаваб қайтуридиғанлиқини билдүргән иди.
иран 13-апрел кечидә исираилийәгә қаритип йүзләрчә учқу вә онларчә башқурулидиған бомба қойуп бәрди. нәтиҗидә, исираилийәниң бәзи һәрбий базилириға башқурулидиған бомба чүшкәнлики қәйт қилинди.
исираилийә учқу вә башқурулидиған бомбиларниң көпинчисиниң һава қалқан системиси тәрипидин тосувелинғанлиқини, җәнубтики һәрбий базиға бир башқурулидиған бомба чүшкәнликини уқтурди.
