әлмалики исираилийәгә һәқиқий бесим қилишни чақириқ қилди
пәләстин ташқи ишлар министири рийад әлмалики йавропаниң пәләстин дөлитини етирап қилиш һәрикитигә «тоғра йөнилиштә бесилған қәдәм» дәп баһа бәрди.
түркийә авази радийоси хәвири: пәләстин ташқи ишлар министирлиқи йазма байанат елан қилип, әлмаликиниң белгийә ташқи ишлар министири хадҗа лаһбиб билән рамаллаһта көрүшкәнликини билдүрди.
көрүшүштә, исираилийәниң ғәззәдә 7-өктәбир (2023) дин буйан бигунаһ пуқраларға қарши қиливатқан ирқий қирғинчилиқ уруши вә инсаний шәрт-шараитлар музакирә қилинди.
пәләстин ташқи ишлар министири әлмалики белгийәни ғәззәдә дала дохтурханиси қурушқа чақирип: «узун муддәтлик уруш тохтитиш, пәләстин пуқралирини хәлқаралиқ қоғдаш вә инсанпәрвәрлик йардәмлирини бихәтәр һалда йәткүзүш әң муһим мәсилиләр һесаблиниду» деди.
у: «көплигән йавропа дөләтлиридә барлиққа кәлгән <икки дөләт һәл қилиш чарәси> ни капаләткә игә қилидиған, қоғдайдиған вә тоқунушларни сийасий йол билән һәл қилидиған шәкилдә пәләстин дөлитини етирап қилиш һәрикәтлири, пәләстинни етирап қилишта дәрһал қарар чиқириш үчүн тоғра йөнилиштә бесилған қәдәм һесаблиниду» деди.
у ғәззәгә қаритилған урушни вә пуқраларға һуҗум қилишни тохтитишқа, йурт-маканлиридин мәҗбурий көчүрүш сийаситини ахирлаштурушқа, мумкин болған әң қисқа вақит ичидә ғәззәгә инсанпәрвәрлик йардәмлирини йәткүзүшкә мәҗбурлаш үчүн, исираилийә һөкүмитигә һәқиқий бесим қилиш керәкликини тәкитлиди.