мәсҗиди әқсада 100 миң адәм тәравиһ намизи өтиди

түркийә авази радийоси хәвири: мәсҗиди әқсани башқуруш ишлириға мәсул «қуддус ислам фонди җәмийити» йазма байанат елан қилип, бүгүнки хуптән вә тәравиһ намизиға 100 миң мусулманниң қатнашқанлиқини билдүрди.

исраилийә сақчилири 2023-йили 7-өктәбирдин буйан пәләстинликләрниң мәсҗиди әқсаға киришигә йол қоймиған, уда бир қанчә һәптә бойичә җүмә намизиға тәхминән 5000 кишилик җамаәт келәлигәниди.

исраилийә сақчилири билән мәсҗиди әқсаға киришкә рухсәт қилинмиған пәләстинликләр оттурисида сүркилишләр йүз бәргәниди. исраилийә сақчилири пәләстинликләрни йаш аққузуш бомбиси вә сесиқ пурақлиқ су ишлитип тарқақлаштурғаниди.

исраилийә сақчилириниң рамизан ейиниң йетип келиши билән бирликтә чәклимини бошаштурушиға әгишип, 120 миң киши мәсҗиди әқсада җүмә намизи оқуғаниди.

ишғал астидики ғәрбий қирғақ билән қудус оттурисидики 2003-йили йасалған бетон там бойида нурғун исраилийә һәрбий тәкшүрүш понкитлири бар.

исраилийә нормал күнләрдә ийордан дәрйасиниң ғәрбий қирғиқидики пәләстинликләрниң алаһидә иҗазәтнамә алған кишиләрдин башқиларниң қуддус тәрәпкә өтүшигә йол қоймайду.

шәрқий қуддус вә ийордан дәрйасиниң ғәрбий қирғиқи 1967-йилдин буйан исраилийәниң ишғалийити астида турмақта.