русийә йавропа иттипақиға тәһдит селишни кечиктүрмиди
русийә ташқи ишлар министирлиқи байанатчиси марийа захарова ғәрбниң русийәниң мал-мүлүклирини мусадирә қилишиға «қаттиқ инкас қайтуридиғанлиқлири» ни вә ғәрбни «оғри» дәп қарайдиғанлиқлирини билдүрди.
түркийә авази радийоси хәвири: русийә ташқи ишлар министирлиқи байанатчиси марийа захарова йавропа иттипақиниң тоңлитип қойулған русийә мал-мүлүклиридин қолға кәлтүрүлгән киримдин украина үчүн пайдилиниш қарари үстидә тохтилип: «<ғәрбниң қилғини оғрилиқ> вә <өзиниң болмиған мал-мүлүкни игидарчилиқиға өткүзүвелиш>» деди.
у русийәниң ғәрбниң һазирқи әһвалдин қандақ пайдиланғанлиқини көргәнликини, шуңа буниңға қайтурулидиған җавабниң қаттиқ болидиғанлиқини әскәртти.
у ғәрбниң украинаға қилған йардәмлириниң орнини толдуруш үчүн русийәниң мал-мүлүклирини игидарчилиқиға өткүзүвалмақчи болғанлиқини қәйт қилди.
бу җәрйанда, америка ташқи ишлар министирлиқи байанатчиси маттев миллер күндилик мухбирларни күтүвелиш йиғинида, йавропа иттипақиниң русийә мал-мүлүклиридин украина үчүн пайдилиниш қарарини қоллайдиғанлиқлирини, шерик дөләтләр билән буниңға йәнә қандақ қошумчә тәдбирләрни йолға қойушниң мумкинлики үстидә давамлиқ музакирә өткүзидиғанлиқлирини билдүрди.
у мәзкур чарә-тәдбирләрниң мәқситиниң, русийәниң украинадики ишғалийитини ахирлаштуруш вә салған зийанлириниң орнини толдуруш икәнликини әскәртти.
йавропа иттипақи кеңиши 12-феврал (2024) русийәниң тоңлитип қойулған мал-мүлүклиридин қолға кәлтүрүлгән киримдин украина үчүн пайдилиниш қарарини тәстиқлиған иди.
