чилидики орман от апитидә қаза қилғанларниң сани 51 кә йәтти

түркийә авази радийоси хәвири: <CNN> қанилиниң хәвиригә асасланғанда, чили пирезиденти габриел борич байанат елан қилип, шараитни нәзәрдә тутқанда от апитидә қаза қилғанлар саниниң көпийиши мумкинликини билдүргән.

пирезидент габриел борич от апитиниң тәсиригә учриған районларға һәрбий қисимларниң орунлаштурулидиғанлиқини әскәртип, еһтийаҗлиқ барлиқ мәнбәләрниң тәййар икәнликини тәкитлиди.

ички ишлар министири каролина тоһаму от өчүрүш хадимлириниң тәхминән 40 от апитини контроллуқ астиға алғанлиқини, 29 орман от апитигә қарши күрәшниң давамлишиватқанлиқини әскәртти.

чили даирилири валпарайсо вә марга марга районида орман от апитиниң давамлишиватқанлиқиға даир учурларни һәмбәһирләп, қаза қилғанлар саниниң 51 кә йәткәнликини билдүрди.

алақидар тармақлар валпарайсодики орман от апитидә тәхминән 1100 өйниң зийанға учриғанлиқини ейтти.

чили мәтбуатлирида елан қилинған хәвәрләрдә, валпарайсо шәһири билән болған арилиқи 20 киломитир келидиған пенуелас көли тәбиий бағчисидиму от апити йүз бәргәнлики билдүрүлди.

дөләтлик апәтниң алдини елиш вә тақабил туруш идариси (Senapred) тәрипидин елан қилинған байанатта, күчлүк шамал сәвәбидин отниң тез тарқалғанлиқи вә бир қисим йеза-базарларда тарқақлаштуруш хизмәтлириниң башланғанлиқи уқтурулди.

пирезидент бориҗ иҗтимаий алақә торида орман от апити сәвәбидин җиддий һаләт елан қилғанлиқини билдүргән иди.

ички ишлар министири тоһаму бәзи от апитиниң «қәстән» чиқирилған болуши мумкинликини ойлишиватқанлиқини билдүргән иди.