байдин мексика чеграсини тақайдиғанлиқлирини билдүрди

түркийә авази радийоси хәвири: пирезидент җо байдин җәнубий калифорнийәдики сайлам сәпәрвәрликидә асаслиқ күнтәртип маддилиридин бири болған чегра бихәтәрлики үстидә тохталди.

у һөкүмәтниң конгрәгә сунған чегра бихәтәрлики қанун тәклипи тәстиқланған әһвалда, америка-мексика чеграсини дәрһал тақайдиғанлиқлирини билдүрүп: «икки партийә қоллиған қанун тәклипи америка үчүн йахши болиду. шуңа, конгрә буни тәстиқлиши керәк» деди.

байдин һөкүмити конгрәгә сунған қанун тәклип лайиһәси, чеградин өткән қанунсиз көчмәнләр сани күнигә 5 миңдин ешип кәткән әһвалда, пирезидентқа чеграни тақаш һоқуқи бериду. лайиһәдә чегра бихәтәрликини сақлайдиған йеңи чарлаш қисимлирини тәшкилләшкә 14 милйард доллар аҗритилидиған хамчот пиланини, қанунсиз көчмәнләрниң рәсмийәтлирини тезләштүридиған хадимларни ишқа елиш вә мунасивәтлик үскүниләрни сетивелишқа 110 милйард доллар аҗритилидиған хамчот пиланини тәстиқлаш тәләп қилиниду.

чегра бихәтәрликини сақлаш мәсуллири нойабир (2023) ейиға селиштурулғанда, декабир ейида %31 лик ешиш билән чеградин өткән 250 миңға йеқин қанунсиз көчмәнни назарәткә алғанлиқлирини, бәзи күнләрдә чеградин өткән қанунсиз көчмәнләр саниниң 10 миңдин ешип кәткәнликини билдүрди.

мәсуллар декабирда тутулған көчмәнләр ичидә 56 миңлиқ рәқәм билән мексикалиқларниң бниринчи орунда, 47 миңлиқ рәқәм билән венезуелиқларниң иккинчи орунда туридиғанлиқини әскәртти.

йәнә бир тәрәптин, байдин һөкүмити билән җумһурийәтчи тексас иштатиниң валийси грег абот (Gregg Abbott) оттурисидики «тикәнлик сим киризиси» давам қилмақта.

америка алий соти еливитш тоғрисида һөкүм чиқарған болсиму, әмма тексас валийси грег абот чеграға тартқан тикәнлик симларни техиму көпәйтмәктә.

у байдин һөкүмитини чегра бихәтәрлики мәсилисидә йетәрлик тәдбир қолланмаслиқ билән әйибләп, қанунсиз көчмәнләрниң америка чеграсидин өтүштә көп пайдилинидиған «Eagle Pass» шәһиридики чегра нуқтисиға тәхминән төт километир узунлуқта тикәнлик сим тартишқа пәрман чүшүргән иди.