چېخىيە ئۇنىۋېرستېتىدا قانلىق ۋەقە يۈز بەردى

تۈركىيە ئاۋازى رادىيوسى خەۋىرى: چېخىيە پىرېزىدېنتى ئېكس (X) ئادرېسىدا ئۇچۇر ھەمبەھرلەپ، كارلس ئۇنىۋېرستېتىدا يۈز بەرگەن ھۇجۇمدىن چوڭقۇر ئەندىشە ھېس قىلغانلىقىنى بىلدۈرۈپ، ھۇجۇمدا جېنىدىن ئايرىلغانلارنىڭ يېقىن-يورۇقلىرىغا سەۋر، يارىلانغانلارغا شىپالىق تىلىدى.

باش مىنىستىر پېتر فىيالا چېخىيە خەلقىگە خىتاب قىلىپ ئېلان قىلغان نۇتۇقىدا، ھۇجۇمنىڭ بىر تىراگېدىيە پەيدا قىلغانلىقىنى ۋە ھەممە كىشىنى چوڭقۇر قايغۇغا سالغانلىقىنى بىلدۈردى.

ئۇ: «بۇ قورقۇنچلىق ھەرىكەتنىڭ ھېچقانداق توغرا تەرىپى يوق. ھەممىڭلارغا ئوخشاش مەنمۇ كىشىنى سەسكەندۈرىدىغان بۇ زوراۋانلىقتىن چوڭقۇر قايغۇردۇم ۋە قاتتىق نەپرەتلەندىم» دېدى.

ئۇ ھۇجۇمدا جېنىدىن ئايرىلغانلارنىڭ يېقىن-يورۇقلىرىغا سەۋر، يارىلانغانلارنىڭ تېزدىن شىپالىق تېپىشىغا تىلەكداشلىق بىلدۈردى.

چېخىيە پايتەختى پىراگاغا جايلاشقان كارلس ئۇنىۋېرستېتىنىڭ پەلسەپە فاكۇلتېتىدا تۈنۈگۈن (21-دېكابىر) يۈز بەرگەن قوراللىق ھۇجۇمدا ئەڭ ئاز دېگەندە 15 كىشى جېنىدىن ئايرىلىپ، 24 كىشى يارىلانغان ئىدى.