G7 рәһбәрләр йиғини ахирлашти

түркийә авази радийоси хәвири:  дунйадики әң тәрәққий тапқан дөләтләрдин америка, әнглийә, фирансийә, канада, германийә, италийә вә йапонийәдин тәшкил тапқан G7 дөләт гуруһи рәһбәрлири, ғәззәдә барғансери йаманлишиватқан инсаний киризисқа һәл қилиш чарәси тепишқа вә пуқраларниң үлүм-йетимини әң төвән чәккә чүшүрүш үчүн җиддий һәрикәт пиланиға еһтийаҗлиқ икәнликлирини билдүрди.

G7 ниң 2023-йилиқ нөвәтчи рәис дөлити болған йапонийәниң саһибханлиқида интернет торида өткүзүлгән рәһбәрләр йиғинида, ғәззә, украина-русийә уруши қатарлиқ дунйа күнтәртипидики мәсилиләр музакирә қилинди.

йиғин ахирида елан қилинған хитабнамәдә, оттура шәрқтики киризис һәққидә «ғәззәдә барғансери йаманлашқан инсаний киризисқа һәл қилиш чарәси тепишқа вә пуқраларниң үлүм-йетимини әң төвән чәккә чүшүрүш үчүн җиддий һәрикәт пиланиға еһтийаҗлиқмиз» дейилди.

бу йардәмләрниң әмәлгә ешиши үчүн «техиму көп инсанпәрвәрлик нуқтисидин вақитлиқ уруш тохтитиш» ни қоллашниң тәшвиқ қилинғанлиқи әскәртилгән хитабнамәдә, һамасниң «барлиқ әсирләрни шәртсиз вә дәрһал қойуп бериши» чақириқ қилинди.

һамасниң һәрбий қанити болған қассам биригадилири 7-өктәбир (2023) «әқса топани» намлиқ кәң көләмлик һуҗум башлиғанлиқини елан қилған иди.

исираилийә армийәсиму буниңға җавабән «төмүр қилич һәрикити» ни башлиғанлиқини елан қилған иди.

күнсери кәскинләшкән тоқунушларда, 16 миң 200 дин артуқ пәләстинлик җенидин айрилди.