келишим бойичә әсирләр қойуп берилди

түркийә авази радийоси хәвири: исираилийә билән һамас оттурисида түзүлгән әсир алмаштуруш келишими рамкисида, исираилийә түрмилиридин пәләстинлик 30 нәпәр айал, үч бала болуп җәмий 33 нәпәр мәһбус қойуп берилди.

қойуп берилгән мәһбуслардин ишғал астидики ийордан дәрйасиниң ғәрбий қирғиқида йашайдиғанлар, хәлқара қизил кирест тәшкилатиниң аптобуслири билән офер һәрбий түрмисидин рамаллаһқа қарап йолға чиқти.

исираилийә әскәрлири пәләстинлик мәһбусларни күтүвелиш үчүн бәйтунйа базирида топланғанларни йаш аққузуш бомбиси вә раст оқ етип тарқитиветишкә урунди.

пәләстин сәһийә министири исираилийә әскәрлириниң оқида бир пәләстиликниң җенидин айрилғанлиқини елан қилди.

шәрқий қуддуста йашайдиған бала мәһбусларму исираилийә сақчилири тәрипидин аилилиригә тапшуруп берилди. исираилийә сақчилири шәрқий қуддуста қойуп берилгән пәләстинлик мәһбусларниң өйиниң әтрапидики йолларда контрол понкитлирини қурди. бәзи пәләстилик мәһбусларниң өйлири тинитлди. аилиләргә «тәбриклимәслик вә өйләрдә йиғилмаслиқ» тоғрисида  агаһландуруш берилди.

исираилийә билән һамас оттурисида түзүлгән келишим рамкисида, ғәззәдин  айал вә бала болуп, җәмий 50 исираилийәлик әсир, исираилийә түрмилиридин айал вә бала болуп, җәмий 150 мәһбус қойуп берилгән болди.

исираилийә билән һамас оттурисидики төт күнлүк «инсанпәрвәрлик нуқтисидин вақитлиқ уруш тохтитиш» келишими, 24-нойабир (2023) җүмә күни шу йәр вақти 07.00, үрүмчи вақти 11.00 дә иҗра қилинишқа башланған иди.