исраилийәниң ғәззәгә қилидиған йеңи һуҗум пилани тәстиқтин өтти
исраилийә армийә баш иштаб башлиқи һерзи һалевиниң һамас билән тоқунушларни төт күн «инсанпәрвәрлик нуқтисидин тохтитиш» тин кейин, ғәззә райониға қилинидиған йеңи һуҗум пиланини тәстиқлиғанлиқи билдүрди.
түркийә авази радийоси хәвири: исраилийә армийәсиниң иҗтимаий таратқу адреслирида һалевиниң тоқунушларни төт күнлүк «инсанпәрвәрлик нуқтисидин тохтитиш» ахирлашқандин кейин, исраилийә қисимлириниң ғәззәгә қилидиған йеңи һуҗум пиланини тәстиқлиғанлиқи һәмбәһирләнди.
баш министир бенйамин нетанйаһуму түнүгүн (2023-йили 26-нойабир) ғәззәниң шималиға берип, «инсанпәрвәрлик нуқтисидин тохтитиш» тин кейин, һуҗумларни давамлаштуридиғанлиқи тоғрисида учур бәрди.
нетанйаһу әскәрләргә хитаб қилип: «урушни ғәлибә қилғанға қәдәр ахириғичә давамлаштуримиз, һечким бизни тохтитип қалалмайду» деди.
исраилийә қисимлириниң 7- өктәбир (2023) җүмә күни әтигәндин буйан ғәззәгә қиливатқан һуҗумлирини төт күн «инсанпәрвәрлик нуқтисидин тохтитиш» келишими түзүлгән иди.
исраилийә армийәсиниң 7 - өктәбирдә башлиған һуҗумлири сәвәбидин, ғәззә районида 6 миң 150 дин артуқ кичик бала вә 4000 дин артуқ айални қошқанда, җәмий 14 миң 854 киши җенидин айрилди.
