хәвпсизлик кеңиши малтаниң тәклипини қобул қилди
б д т хәвпсизлик кеңиши ғәззәдә тоқунушларни «дәрһал вә муддити узартилған уруш тохтитиш» тәләп қилинған қарар лайиһәсини қобул қилди.
түркийә авази радийоси хәвири: б д т хәвпсизлик кеңиши малта тәрипидин сунулған тәклип лайиһәсини авазға қойди. лайиһә 12 әза дөләтниң қоллиши, үч әза дөләтниң һоқуқидин ваз кечиши билән қобул қилинди.
америка, русийә вә әнглийә һоқуқидин ваз кәчти. русийәниң «инсанпәрвәрлик нуқтисидин урушни вақитлиқ тохтитиш» дегән сөзниң орниға, « уруш тохтитиш» дәп өзгәртиш киргүзүш тәлипи рәт қилинди.
қарарда, «инсанпәрвәрлик нуқтисидин уруш тохтитиш» дегәнниң орниға, «дәрһал вә муддити узартилған уруш тохтитиш» дейилиди вә «хәлқара қанунға уйғун шәкилдә ғәззәдә каридор тәсис қилиш» тәләп қилинди.
урушни вақитлиқ тохтитишниң хәлқара қанунға уйғун шәкилдә «йетәрлик күн» болуши керәклики тәләп қилинған қарарда, б д т вә шериклиригә, инсанпәрвәрлик йардәмләрниң изчил, тез вә бихәтәр шәкилдә йәткүзүш чақириқ қилинди.
қарарда йәнә, һамас вә башқа гуруппилардин алди билән балиларни өз ичигә алған һалда барлиқ әсирләрни қойуп бериш, ғәззәдики пуқраларниң күндилик еһтийаҗини тәминләшкә тосқунлуқ қилмаслиқ тәләп қилинди.
қарарда, б д т баш катипи гутерресниңму қарарниң иҗра қилинишиға мунасивәтлик б д т хәвпсизлик кеңишигә мәлумат бериши тәләп қилинди.
тәклип лайиһәси авазға қойулғандин кейин, американиң б д т даимий вәкили линда гринфилд: «һамасниң террорлуқ һәрикәтлирини әйиблимәсликкә һечқандақ сәвәб йоқ. һамас бу тоқунушни кәлтүрүп чиқарди» деди.
әнглийәниң б д т дики даимий вәкили барбара вудворд пәләстин хәлқи тартиватқан азаб-оқубәтләрни чүшәнгили болмайдиғанлиқини әскәртип: «бу қарар һайат қутқузиду. техиму көп йоллардин инсанпәрвәрлик йардәмлириниң тез сүрәттә йәткүзүлүши үчүн бирликтә һәрикәт қилишимиз керәк» деди.
қарарда «һамасниң террорлуқ һәрикәтлириниң очуқ әйибләнмигәнлики» дин қайғурғанлиқлирини билдүргән вудворд, бу сәвәбтин әнглийәниң һоқуқидин ваз кәчкәнликини әскәртти.
русийәниң б д т дики даимий вәкили вассилй небензийа малта сунған тәклип лайиһәсидә нурғун йетәрсизликләрниң барлиқини, әмма инсанпәрвәрлик нуқтисиға әһмийәт берилгәнлики үчүн рәт қилмиғанлиқлирини билдүрди.
қарардики асаслиқ йетәрсизликниң «дәрһал уруш тохтитиш чақириқи» ға орун аҗритилмиғанлиқини әскәрткән небензийа, буниң биринчи муһим иш болуши керәкликини тәкитлиди.
у мундақ деди:
«вақитлиқ уруш тохтитишлар, һәрбий һәрикәтләрни техиму күчләндүрүп қайта әкилиду.»
