иран вә венгирийә ташқи ишлар министирлири ғәззә мәсилиси тоғрисида сөзләшти
иран ташқи ишлар министири һүсәйин әмир абдуллаһийан билән венгрийәлик мәнсәпдиши петер сизиҗарто икки дөләтниң мунасивити һәмдә пәләстинниң нөвәттики вәзийити тоғрисида сөзләшти.
түркийә авази радийоси хәвири: иран ташқи ишлар министирлиқи иҗтимаий таратқу суписи «X» тики адресида байанат елан қилип, министир абдуллаһийан билән венгрийә ташқи ишлар, қошумчә ташқи сода министири сизиҗартониң телефонлашқанлиқини уқтурди.
байанатта көрситилишичә, һуҗумлар сәвәбидин ғәззәдики инсанпәрвәрлик вәзийитиниң йаманлашқанлиқини әскәрткән абдуллаһийан, исраилийәниң ғәззәдики кишиләрни бомбардиман қилиш вә коллектип һаләттә өлтүрүш арқилиқ барлиқ кишилик һоқуқ вә хәлқара қанунларға очуқ-ашкарә хилаплиқ қилғанлиқини оттуриға қойған.
у, исраилийәниң ғәззәгә қаратқан һуҗумлириниң дәрһал тохтитилиши, дәрһал вә шәртсиз уруш тохтитишниң капаләткә игә қилиниши вә ғәззә хәлқигә инсанпәрвәрлик йардәмлирини йәткүзүп бериш пурситиниң йаритилиши үчүн, хәлқара җәмийәтниң бесим ишлитиши керәкликини тәкитлигән.
абдуллаһийан иран билән венгирийә оттурисидики мунасивәтниң күнсери күчийиватқанлиқини тилға елип, өзара кеңишишни давамлаштурушниң икки дөләт мунасивитиниң тәрәққийатиға пайдилиқ икәнликини оттуриға қойған.
венгрийә ташқи ишлар министири сизиҗартому иран билән венгрийә мунасивитини һәр җәһәттин илгири сүрүшниң давамлаштурулидиғанлиқини вә буниңға илһамландурулушини үмид қилидиғанлиқини билдүргән.
у йәнә, дөлитиниң пәләстинниң нөвәттики тәрәққийатиға тутуватқан позитсийәсиниму тилға елип өткән.
