җоко видодо американи ғәззәдики вәһшийликни тохтитишқа чақирди
һиндонезийә пирезиденти җоко видодо америка пирезиденти җо байдин билән өткүзгән учришишида, американи ғәззәдә йүз бериватқан зулумни тохтитиш үчүн техиму көп тиришчанлиқ көрситишкә чақирди.
түркийә авази радийоси хәвири: американиң пайтәхти вашингтонда америка пирезиденти җо байдин билән һиндонезийә пирезиденти җоко видодо икки тәрәплик учришишитин илгири мухбирларға байанат елан қилди.
пирезидент байдин икки дөләт мунасивитигә муһим әһмийәт беридиғанлиқлирини тилға елип, икки тәрәп мунасивәтлирини кәң даирилик истратегийәлик шериклик сәвийәсигә чиқиридиғанлиқлирини билдүрди.
һиндонезийә пирезиденти видодо икки дөләт мунасивәтлириниң муһимлиқини тәкитләп: «һиндонезийә америка билән болған һәмкарлиқларниң район вә йәр шари тинчлиқиға шундақла гүллинишигә төһпә қошушини үмид қилиду. шуңа, һиндонезийә американи ғәззәдики вәһшийликни тохтитиш үчүн техиму көп тиришчанлиқларни көрситишкә чақириду. инсанийәтниң уруш тохтитишқа җиддий еһтийаҗи бар» деди.
байдин билән видодо өзара учришиштин кейин, бирләшмә йазма байанат елан қилди.
байанатта, һиндонезийә-америка мунасивәтлириниң «универсал истратегийәлик шериклик» сәвийәсигә көтүрүлгәнлики уқтурулди.
бу шериклик даирисидә, йеңилиқ йаритиш, сиҗил тәрәққийат, аммиви сағламлиқ, диҗитал өзгириш вә йешил енергийә қатарлиқ саһәләрдә өзара һәмкарлиқ орнитилидиғанлиқи билдүрүлгән байанатта йәнә, икки дөләтниң мудапиә һәмкарлиқиниңму чоңқурлаштурулидиғанлиқи тәкитләнди.
