ғәрбий қирғақтики тул кәрим лагериға ракета етилди, үч пәләстинлик җенидин айрилди

түркийә авази радийоси хәвири: пәләстин вафа (WAFA) агентлиқиниң хәвиридә қәйт қилинишичә, тул кәримдики сабит дохтурханисиға исираилийәниң учқусидин етилған ракетаниң чүшүши нәтиҗисидә үч пәләстиник җенидин айрилған.

тул кәрим мусапирлар лагериға бесип киргән исираилийә әскәрлири билән пәләстинлик йашлар оттурисида еғир тоқунуш йүз бәрди. райондики өйләрниң өгзисигә орунлашқан исираилийә мәргәнлириниң пәләстинликләрни оққа тутқанлиқи, җенидин айрилғанлардин башқа, төт пәләстинлик йашниң мәргәнләр атқан оқта йариланғанлиқи қәйт қилинди.

йәнә бир тәрәптин, исираилийә әскәрлириниң йаридарларни дохтурханиға апириш үчүн районға кәлгән қутқузуш машинилирини тосуп, қаттиқ тәкшүрүшләрдин кейин йаридарларни қутқузушқа рухсәт қилғанлиқи әскәртилди. давалиниш үчүн дохтурханиға апирилмақчи болған бир йаридар пәләстинликниң исираилийә әскәрлири тәрипидин мәҗбурий машинидин чүшүрүлүп қолға елинғанлиқи билдүрүлди.

тул кәрим мусапирлар лагеридики исламий вә миллий қаршилиқ көрситиш гуруппилири, омумийүзлүк иш ташлиди. ийордан дәрйасиниң ғәрбий қирғиқиға җайлашқан әлхалил шәһириниң шәрқидики бәйт айнун әтрапида, исираилийә әскәрлири бир пәләстинлик йашни етип өлтүрди.

шуниң билән, ийордан дәрйасиниң ғәрбий қирғиқида 7-өктәбир (2023) дин буйан исираилийә әскәрлири вә йәһудий көчмәнлири тәрипидин өлтүрүлгән пәләстинликләрниң сани 193 кә чиққан болди.