байербок пәләстин - исраилийә мәсилисини икки дөләтлик һәл қилиш чарисидә чиң турушни тәкитлиди
германийә ташқи ишлар министири анналина байербок парс қолтуқидики әрәб дөләтлирини оттура шәрқтә икки дөләтлик һәл қилиш чарисини йолға қойуш тиришчанлиқини давамлаштурушқа чақирди.
түркийә авази радийоси хәвири: германийә йешиллар партийәси мәнсупи сийасәтчи, германийә ташқи ишлар министири анналина байербок җүмә күни башланған әрәб бирләшмә хәлипилики, сәуди әрәбистан вә исраилийә зийарәтлиридин илгири байанат берип: «пәқәт икки дөләт йанмуйан мәвҗут болуп туруш вәдисигә қайтип кәлгәндила, исраилийә вә пәләстинликләргә тинчлиқ, бихәтәрлик вә иззәт – һөрмәткә игә турмуш несип болиду» деди.
у исраилийә билән әрәб қошнилири оттурисидики тинчлиқ орнитишниң тарихий пурситини «қолдин берип қоймаслиқ керәк»ликини оттуриға қойди.
ғәззәгә инсанпәрвәрлик йардәмләрниң әвәтилиши, әсирләрниң қойуп берилиши йаки райондики зораванлиқниң йамрап кетишиниң алдини елиш тиришчанлиқлиридиму, «пәқәт парс қолтуқидики әрәб дөләтлири билән бирликтә һәрикәт қилсақла, мувәппәқийәт қазиниш пурситимиз бар» дегән байербок, ғәззә урушида миңларчә пуқраниң һайатиниң набут болушиға қаримай, исраилийәниң «қилчә иккиләнмәстин германийәгә ишәнсә болидиғанлиқи»ни тәкитлиди.
байербок ғәззәдики кишиләрниң азаб - оқубәтлирини «мәлум дәриҗидә болсиму йениклитиш» үчүн су, йемәклик вә дора қатарлиқ асаслиқ еһтийаҗларни җиддий тәминләш керәкликини оттуриға қойди.
