коломбийә пәләстиндә әлчихана ачидиғанлиқини уқтурди
коломбийә пирезиденти густаво петро дөлитиниң пәләстиндә әлчихана ачидиғанлиқини елан қилди.
түркийә авази радийоси хәвири: коломбийә пирезиденти петро өзиниң иҗтимаий таратқу суписи <X> тики адресида, исраилийәниң боготада турушлуқ баш әлчиси гали даган вә пәләстинниң боготада турушлуқ баш әлчиси раулф әлмалик билән чүшкән сүрәтлирини һәмбәһрилиди.
пирезидент петро баш әлчиләр билән көрүшкәндин кейин дөлитиниң рамаллаһта әлчихана ачидиғанлиқини байан қилип: «мән мустәқил вә әркин икки дөләтниң йолини ачидиған хәлқаралиқ тинчлиқ йиғини ечиш тоғрисидики мәйданимни ипадилидим. мән тинч йашиши керәк болған, шундақла бу һоқуқларға игә исраилийәлик вә пәләстинлик балилар билән һәмнәпәс икәнликимни тәкитлидим. ғәззәгә инсанпәрвәрлик йардәм буйумлири бесилған бир айропилан әвәтимиз. коломбийә пәләстинниң рамаллаһ шәһиридә әлчихана ачиду» деди.
у 9- өктәбир өзиниң X тики адресида байанат елан қилип, исраилийәниң һамас (пәләстин исламий қаршилиқ көрситиш һәрикити)ниң һуҗумиға инкас қайтуруш шәклини тәнқид қилғаниди.
исраилийәниң һуҗумлирида һайатидин айрилған пәләстинлик балиларниң сүрәтлирини иҗтимаий таратқудики адресида һәмбәһрилигән петро: «пәләстинлик балиларниң хатирҗәм ухлишиниң бирдинбир йоли исраилийәлик балиларниң хатирҗәм ухлишидур. исраилийәлик балиларниң хатирҗәм ухлишиниң бирдинбир йоли пәләстинлик балиларниң хатирҗәм ухлишидур» дегәнләрни қәйт қилғаниди.
