хәлқаралиқ җәмийәтләр дохтурхана һуҗумини әйиблиди

түркийә авази радийоси хәвири: б д т баш катипи антонийо гутеррес иҗтимаий таратқу адресида, исираилийәниң әләһли баптист дохтурханисиға қилған һуҗуми тоғрисида учур һәмбәһрлиди.

у йүзләрчә пәләстинликниң өлүмигә сәвәб болған дохтурхана һуҗумидин қаттиқ чөчүгәнликини билдүрүп: «бу һуҗумни қаттиқ әйибләймән. қурбанларниң аилилиригә һесдашлиқ қилидиғанлиқимни ейтимән. дохтурханилар вә сәһийә хадимлири хәлқара қанунниң қоғдиши астида» деди.

б д т хәвпсизлик кеңиши русийә вә әрәб бирләшмә хәлипиликиниң чақириқ қилиши билән, ғәззәдики әләһли бапсит дохтурханиси һуҗумини музакирә қилиш үчүн бүгүн (18-өктәбир) шу йәр вақти 10.00, әнқәрә вақти 17.00, үрүмчи вақти 20.00 дә топлиниду.

пәләстинниң б д т дики даимий вәкили рийад мәнсур нийу йорктики б д т бинасида әрәб гурупписи намида байанат елан қилип: «исираилийә күчлири тәрипидин қилинған қәтлиамни қаттиқ әйибләймиз. бу җинайәтни өткүзгәнләр җазаға тартилиши керәк. әгәр хәвпсизлик кеңиши вәзиписини ада қилип, түнүгүн тоқунушни тохтиталиған болса хәлқимизгә қарши җинайәт өткүзүлмигән болатти, 500 киши биз билән биллә болатти. б д т хәвпсизлик кеңиши әмди ойғиниши керәк. б д т ниң бу җинайәтни әйибләш биләнла қалмай, дәрһал уруш тохтитишни капаләткә игә қилиши керәк» деди.

әрәб иттипақиму исираилийәниң ғәззәдики әләһли бапсит дохтурханисиға қилинған һуҗум сәвәбидин байриқини йерим чүшүрди вә үч күнлүк матәм елан қилди.

ислам һәмкарлиқ тәшкилати йүзләрчә кишиниң җенидин айрилишиға сәвәб болған исираилийәниң ғәззәдики әләһли бапсит дохтурханисиға қилған һуҗумини «тәшкиллик дөләт террорлуқи» дәп атиди.

ислам һәмкарлиқ тәшкилатиниң байанатида, исираилийәниң ғәззәдики дохтурханисиға қилған қәтлиамини шиддәт билән әйибләп, буниң «инсанийәткә қарши җинайәт» вә «уруш җинайити» икәнликини тәкитлиди.

исираилийәниң түнүгүн (2023-йили 17-өктәбир) кәчтә ғәззәдики әләһли бапсит дохтурханисини бомбардиман қилиши нәтиҗисидә 500 киши җенидин айрилған иди.