исираилийәдә җиддий һаләт һөкүмити қурулди
исираилийә парламенти һамас билән давамлишиватқан тоқунуш бойичә күчкә игә болидиған «җиддий һаләт һөкүмити» ниң қурулушини тәстиқлиди.
түркийә авази радийоси хәвири: исираилийә парламенти байанат елан қилип, «һамас билән уруш давамлашқан муддәттә күчкә игә болидиған җиддий һаләт һөкүмитиниң төт авазға қарши 64 авазниң қоллиши билән тәстиқланғанлиқи» ни билдүрди.
байанатта, чоң өктичи партийәниң рәһбири вә сабиқ баш министир йаир лапидниң бу һөкүмәткә қатнашмиғанлиқи әскәртилди.
җиддий һаләт һөкүмити келишиминиң, исираилийәниң ички җәһәттин бөлүнүшигә вә кәң көләмлик намайишларға сәвәб болған «сот ислаһати» мәсилисиниң тоңлитилишини өз ичигә алидиғанлиқи қәйт қилинған байанатта, «тоқунуш мәзгилидә, тоқунушқа мунасивәтлик болмиған, һөкүмәт қоллиған қанун тәклип-лайиһәлириниң парламентқа сунулмайдиғанлиқи тәкитләнди.»
исираилийә дөләт телевизийәси кан (KAN) ниң хәвиридә көрситилишичә, җиддий һаләт һөкүмити, баш министир нетанйаһу билән өктичи партийә әзалиридин бенний гантз оттурисида, гантзниң «көк-ақ» партийәсиниң бәш әзасиниң министир болушиға мунасивәтлик түзүлгән келишим нәтиҗисидә қурулған.
«көк-ақ» партийәсиниң бәш әзаси қатнашқан кабент ичидин сабиқ дөләт мудапиә министири гантз билән һазирқи дөләт мудапиә министири йоав галлант вә баш министир нетанйаһуларму орун алди.
һамасниң һәрбий қанити қассам биригадилири шәнбә (2023-йили 7-өктәбир) күни исраилийәгә «әқса топани» намлиқ кәң көләмлик һуҗум қозғиғанлиқини елан қилған иди. ғәззәдин исраилийәгә миңлиған ракеталар етилған вә қораллиқ гуруппилар райондики йәһудий олтурақ районлириға бесип киргән иди.
исраилийә армийәси шуниңдин кейин, уруш айропиланлири билән ғәззә райониға қарши «төмүр қилич» һәрикитини қозғиғанлиқини елан қилған иди.
икки тәрәптниң күнсери кәскинлишиватқан тоқунушлирида, йүзлигән киши җенидин айрилди.
