б д т һәйити: қарабағдики әрмәнләрниң зийанкәшликкә учриғанлиқиға даир пакитларни байқимидуқ
бирләшкән дөләтләр тәшкилати (б д т), қарабағқа барған б д т вәкилләр өмикиниң әрмән аһалилиригә зораванлиқ қилинғанлиқиға даир испатларни учратмиғанлиқи вә райондики мәмурий ул- әслиһәләрниң зәрбә обйекти қилинмиғанлиқини көргәнликини билдүрди.
түркийә авази радийоси хәвири: б д т байанатчиси истефан дуҗаррик әзәрбәйҗан һөкүмитиниң тәклипигә бинаән, һәптә ахирида қарабағқа йетип берип, әмәлий вәзийәтни көздин кәчүргән б д т вәкилләр өмикиниң зийарити һәққидә мәлумат бәрди.
вәкилләр өмикиниң райондики инсаний еһтийаҗларни ениқлашқа урунғанлиқини билдүргән дуҗаррик, вәкилләр өмики әзалириниң дунйа сәһийә тәшкилати, б д т балилар фонди, б д т мусапирлар алий комиссарлиқи вә б д т инсанпәрвәрлик ишлирини маслаштуруш ишханиси хадимлиридин тәркиб тапқанлиқини билдүрди.
дуҗаррик вәкилләр өмикиниң лачин чегра тәкшүрүш понкити вә ханкәнди шәһиридә тәкшүрүш елип барғанлиқини әскәртип: «вәкилләр өмики өзлириниң әрмән пуқралириға қаритилған зораванлиқ испатини тапалмиғанлиқи вә райондики пуқралар ул- әслиһәлириниң зәрбә обйекти қилинмиғанлиқини көргәнликини доклат қилди» деди.
дохтурханилар, мәктәпләр, өй - маканлар, диний вә мәдәнийәт мәркәзлириниң һуҗум нишани қилинмиғанлиқини, әзәрбәйҗан һөкүмитиниң үзлүксиз сағламлиқ мулазимити билән тәминләш үчүн күч чиқириватқанлиқини билдүргән дуҗаррик, деһқанчилиқ районлири вә һайванларниңму зийанға учримиғанлиқи байқалди, деди.
у вәкилләр өмикиниң райондики әрмән аһалисиниң вәкиллири биләнму көрүшкәнликини қәйт қилди.
дуҗаррик районниң бихәтәрликини әслигә кәлтүрүшниң муһимлиқини тәкитләп, һәрқайси тәрәпләрниң буниң үчүн күч чиқириши керәкликини сөзлиригә илавә қилди.
