байдин: америка б д т хәвпсизлик кеңишидә ислаһат елип бериш тиришчанлиқини давамлаштуриду

түркийә авази радийоси хәвири: байдин нйуйоркта давамлишиватқан 78 - нөвәтлик б д т омумий кеңиши йиғинида қилған сөзидә, американиң исраилийә билән пәләстин оттурисида <икки хәлқ үчүн икки дөләт> қуруш нишанини бойлап, адил вә узақ муддәтлик тинчлиқни давамлиқ қоллайдиғанлиқини тәкитлиди.

у сөзидә йәнә, русийә - украина уруши һәққидә тохтилип: «русийәниң қошниси украинаға қилған һуҗуми дәрһал ахирлишиши керәк. америка украина хәлқи билән бир сәптә турушни давамлаштуриду. тинчлиққа тосалғу болуватқини йалғузла русийә. әгәр биз украинаниң парчилинишиға рази болсақ, биз өзимизни қандақму бихәтәр һес қилалаймиз? америка батур украина хәлқини давамлиқ қоллайду» деди.

байдин өз дөлитиниң террорлуқ тәшкилатлириға қарши күрәш қилишни давамлаштуруватқанлиқини тилға елип: «биз демократийә башлиқлар йиғини тәшкилләш арқилиқ дунйа демократийәсини күчәйтишкә тиришиватимиз. африқа дөләтлиридики арқа - арқидин йүз бәргән сийасий өзгиришләр бу тиришчанлиқларниң нәқәдәр муһимлиқини көрситип бериду. биз африқа әллири иттипақи вә африқа иқтисадий ортақ гәвдиси билән бир сәптә» деди.

америка пирезиденти хитай билән болған риқабәтниң тоқунушқа айлинип қалмаслиқи керәкликини оттуриға қойуп, өзлириниң хитайни чәткә қақмиғанлиқини вә һәмкарлишип хизмәт қилишқа очуқ икәнликлирини билдүрди.

америка қошма иштатлириниң сәмимийлик билән кәң көләмлик қирғучи қоралларниң хәтирини төвәнлитишни давамлаштуридиғанлиқиға ишарәт қилған пирезидент байдин: «бу йил биз американиң қолидики әң ахирқи химийәлик қорални йоқаттуқ. әмма, биз шималий корейә билән иранниң район вә дунйави тәһдит икәнликидин ибарәт реаллиқни әндишә ичидә көзитимиз. биз иранниң қолида йадро қорали болмаслиқи керәкликини тәкрарлаймиз» дегәнләрни сөзлиригә илавә қилди.