хитай йапонийәниң қарариға наразилиқ билдүрди

түркийә авази радийоси хәвири: хитай ташқи ишлар министирлиқиниң байанатиға қариғанда, муавин министир сун вейдоң йапонийәниң бейҗиңда турушлуқ баш әлчиси таруми һидейони бу мәсилә тоғрисида министирлиққа чақирған.

сун көрүшүштә, йапонийәниң қарарини «шәхсийәтчилик вә мәсулийәтсизлик» дәп наразилиқ билдүрди.

у мәзкур қарар билән йапонийәниң өз мәнпәәтини қошна дөләтләрниң әндишәсиниң алдиға қойғанлиқини ипадиләп, хитайниң деңиз-окйан екологийәси, йемәк-ичмәк бихәтәрлики вә хәлқ сақлиқини қоғдаш үчүн зөрүр тәдбирләрни йолға қойидиғанлиқи тоғрисида агаһландурди.

йапонийә әлчиханиси бу һәқтики байанатида, баш әлчи тарумиму көрүшүштә һөкүмәтниң паскина су қойуп бериш пиланини очуқ-ашкара вә илмий усулда чүшәндүргәнликини, хитайниң бу мәсилидики етиразлириниң илмий асаси йоқлуқини билдүрди.

байанатта, баш әлчи таруминиң йавропа иттипақи вә башқа иқтисадий гәвдиләрниң йапонийәдин су вә йемәк-ичмәк мәһсулатлириға болған контроллуқни бикар қилғанлиқини әскәртип, хитайниң бу тоғрида қәдәм басқан йалғуз дөләт икәнликини, уларниң илмий асаси болмиған бундақ тәдбирлирини қобул қилмайдиғанлиқлирини тәкитлиди.

йапонийә баш вәзири кишида фумийо түнүгүн (22-авғуст) кабинет йиғинидин кейин елан қилған байанатида, фукушима дайчи йадро електр истансисиниң радийактиплиқ паскина сүйиниң деңиз-окйанға қойуп берилидиғанлиқини уқтурған иди.

хәлқара атом енергийәси оргини 4-ийул (2023) електр истансисидики тәкшүрүшләрдин кейин доклат елан қилип, йапонийәниң паскина су қойуп бериш пиланиниң бихәтәрлик өлчимигә мас келидиғанлиқини билдүргән иди.

2011-йили мартта йүз бәргән 9 бал йәр тәврәштин кейин оттуриға чиққан деңиз ташқини фукушима дайчи йадро електр истансисидики төт йадро реакториниң үчи бузғунчилиққа учрап, йадро електр истансисиниң әтрапи «тарқақлаштуруш райони» дәп елан қилинған иди.