дуда «русийә тәсирини тәкшүрүш» қануниға өзгәртиш киргүзүш тәклипини тәстиқлиди
полша пирезиденти андрзеҗ дуда русийәниң полша һөкүмәтлиригә тәсир көрситиватқанлиқи тоғрисидики әйибләшләрни тәкшүрүш мәхсус комитети қурушни мәзмун қилған қанунға түзитиш киргүзүш лайиһәсини тәстиқлиди.
түркийә авази радийоси хәвири: русийәниң 2007- йилидин 2022- йилиғичә болған җәрйанда полшаниң ички бихәтәрликигә арилишишини тәкшүрүш үчүн дөләт комитети қурушни мәзмун қилған қанун 31- майдин башлап йолға қойулғаниди.
мәзкур қанунға асасән, тәкшүрүш комитети тәрипидин русийәниң тәсири астида һәрикәт қиливатқанлиқи байқалған сийасийонларниң аммиви хизмәтләр билән шуғуллинишини чәкләшкә болатти.
қанун полшада өктичиләр рәһбири доналд туск бу йил күздә өткүзүлидиған парламент сайлимиға қатнишишниң алдини елишниң баһаниси дәп қаралған вә өктичиләрниң қаттиқ тәнқидигә учриғаниди.
пирезидент дуда дөләт ички вә хәлқараниң бу қанун тоғрисидики тәнқидлиригә қарита, 2 – ийун комитет қуруш қануниға түзитиш киргүзүшни оттуриға қойуп, йеңи тәкшүрүш оргининиң парламент әзалирини өз ичигә алмаслиқи вә қанунниң әң көп талаш- тартиш қозғиған <аммиви хизмәтләр билән шуғуллиништин чәкләш> қисминиң қайтурувелиниши керәкликини ейтқаниди.
андрзеҗ дуда русийәниң полша һөкүмәтлиригә тәсир көрситиватқанлиқи тоғрисидики әйибләшләрни тәкшүрүш мәхсус комитети қурушни мәзмун қилған қанунға түзитиш киргүзүш лайиһәсини түнүгүн тәстиқлиди.
полша парламентиниң төвән палатаси сеҗм кеңәш палатасиниң қарши турушиға қаримай, 28- ийул 214 кә қарши 235 беләт билән қанун лайиһәсини тәстиқлиғаниди.
