дунйа мусулман өлималар бирләшмиси хатибларни қуран кәримгә қилинған һуҗумларни әйибләшкә чақирди
дунйа мусулман өлималар бирләшмиси дунйаниң һәр қайси җайлиридики имам - хатибларни җүмә хутбилиридә қуран кәримгә қилиниватқан һуҗумларни әйибләшкә чақирди.
түркийә авази радийоси хәвири: дунйа мусулман өлималар бирләшмиси дунйаниң һәр қайси җайлиридики имам - хатибларни бу һәптилик җүмә хутбилиридә шиветсийәниң пайтәхти стокһолмдики бир җамәниң алдида садир қилинған қуран кәримни көйдүрүш қилмишини әйбләшкә вә мәсҗиди әқса қатарлиқ пәләстиндики муқәддәс җайларни қоғдаш мәсилилирини оттуриға қойушқа чақирди.
дунйа мусулман өлималар бирләшмисиниң стокһолмдики қуран кәримни көйдүрүштәк қәбиһ қилмиш әслитип өтүлгән йазма байанатида: «өчмәнликкә толған, қутритиш характерлик бу җинайи қилмиш барлиқ қиммәт қарашларға, әхлаққа вә диний җәһәттики муқәддәс амилларға һөрмәт қилиш вә уларға кәң қорсақлиқ билән муамилә қилиш пиринсипиға хилап» дегән ибариләргә орун берилди.
шуниң билән бир вақитта, «таҗавузчилар»ниңму пәләстиндики бәзи мәсчитләрдә қуран кәримни йиртивәткәнлики вә мусулманларниң тунҗи қиблисигә биһөрмәтлик қилғанлиқиға ишарәт қилинған байанатта, буниңдин илгириму һақарәт характерлик һәҗвий рәсимләрниң елан қилинғанлиқи, әмма һөкүмәт вә хәлқләрниң буниңға күчлүк наразилиқ билдүрмигәнлики қәйт қилинғандин кейин: «биз барлиқ мусулман өлималарни 7- ийулға тоғра келидиған җүмә хутбисидә шиветсийәдики қуран кәримни көйдүрүш қилмишини әйибләшкә һәмдә мәсҗиди әқса вә пәләстиндики муқәддәс җайлиримизни қоғдаш һәққидә сөзләшкә чақиримиз» дейилди.
байанатта йәнә, мусулман дөләтләр бу хил җинайәтни садир қилғанларға қарши дипломатик вә иқтисадий байқут елан қилиш қатарлиқ әмәлий тәдбирләрни қоллинишқа чақирилди.
мусулман дөләтлириниң һөкүмәтлири кишилик һоқуқ тәшкилатлири билән һәмкарлишип, динни һақарәтләшни җинайәт һесаблайдиған бир қанун мақуллашқа чақирилған байанатта, иккинчи қәдәмдә, мәзкур қанунни динға һуҗум қилишниң хәлқараниң тинчлиқ вә бихәтәрликигә хилаплиқини нәзәрдә тутуп, бирләшкән дөләтләр тәшкилатиға тапшуруш керәклики оттуриға қойулди.
байанатта йәнә, мусулман аз санлиқларғиму бу мәсилигә қарши «тинчлиқ» намайишлирини өткүзүшни вә әдлийә органлириға әрз сунушни тәвсийә қилди.
