йавропа дөләтлири көчмәнләр вә панаһланғучилар бәлгилимиси мәсилисидә келишәлмиди
полша билән венгирийәниң қаршилиқи сәвәбидин йавропа иттипақи йеңи ортақ көчмәнләр вә панаһлиниш бәлгилимиси тоғрисидики талаш- тартишни һәл қилалмиди.
түркийә авази радийоси хәвири: белгийәниң пайтәхти бирйусселда икки күн давамлашқан йавропа иттипақи башлиқлар йиғинида, йавропа иттипақи рәһбәрлири көчмәнләр тоғрисидики бирләшмә байанатни қобул қилалмиди.
йавропа иттипақи комитети тәрипидин оттуриға қойулғандин кейин, мушу айниң бешида көп санлиқ тәрипидин қобул қилинған «иттипақлиқ механизми»ниң көчмәнләрниң йавропа иттипақидики һәр бир дөләткә мәҗбурий тәқсимлинишини, әксичә болғанда, әза дөләтләрниң һәр бир көчмән үчүн 20 миң йавро төлишини мәзмун қилған бәлгилимисигә полша билән венгирийә етираз билдүрди.
башлиқлар йиғининиң күнтәртипидики башқа мәсилиләр тоғрисида бирләшмә байанат елан қилинған болсиму, көчмәнләр тоғрисида пәқәт йавропа кеңиши рәиси чарлез мишелниң имзаси билән бирла һөҗҗәт тарқитилди.
мишел мәзкур һөҗҗәттә «полша билән венгрийәниң үнүмлүк көчмәнлик вә панаһлиниш сийасити мәсилисидә йаришишқа еһтийаҗиниң барлиқини, иттипақлиқ тәдбирлири даирисидә көчмәнләрниң тәқсимлинишиниң пидакарлиқни асас қилиши керәкликини оттуриға қойғанлиқи қәйт қилинди» дегән ибариләргә орун бәрди.
мишел башлиқлар йиғини ахирлашқандин кейин өткүзүлгән мухбирларни күтүвелиш йиғинида, украиналиқ мусапирларни көпләп қобул қилған венгирийә билән полшаниң йеңи қаидиләрниң лайақәтлик көп санлиқлар тәрипидин әмәс, бирдәк мақуллинишини тәләп қилғанлиқини, уларниң тәлипигә асасән өзгәртилгән ортақ байаннамигә имза қойулмиғанлиқини билдүрди.
