титаник сайаһити тәшкиллигән су асти парахоти тепилди

түркийә авази радийоси хәвири: йәкшәнбә күни (18-ийун) атлантик окйандики титаник парахотиниң қалдуқлирини көрүш сәпиридә ғайиб болған «титан» намлиқ су асти парахотиниң «қалдуқлири», су асти парахотидики җенидин айрилған бәш кишиниң җәсити билән биргә тепилди.

америка деңиз қирғиқи муһапизәт әтритиниң хадимлири су асти парахотиниң бесим сәвәбидин партлап парчилинип кәткәнликини елан қилди.

«титан» намлиқ су асти парахотиниң парчилири, титаникниң қалдуқлиридин 488 метир йирақлиқта, төт километир чоңқурлуқта тепилди.

«вал кочиси гезити», америка деңиз армийәсиниң мәхпий аваз системисиниң титан су астиға шуңғуп узун өтмәйла партлаш авазини байқиғанлиқини йазди.

су асти парахотиға мунасивәтлик ечинишлиқ тәпсилатлар оттуриға чиқишқа башлиди.

йоқап кәткән су асти парахотида җенидин айрилған әнглийәлик милйардер стоктон руш (StocktonRush) ниң айали венди руш (Wendy Rush) ниң 1912-йили титаник вәқәсидә җенидин айрилған бир әр-айалниң нәвриси икәнлики билдүрүлди.

узунлуқи тәхминән 6.5 метир келидиған су асти парахоти титан, бәш йолучиси билән йәкшәнбә күни 96 саәт йетидиған оксиген миқдари билән суға шуңғуп, титаник парахотиниң қалдуқлирини көрүш сайаһити тәшкиллигән иди.

бу йолучилар ичидә 58 йашлиқ әнглийәлик милйардер хамиш хардиң (Hamish Harding), пакистандики әң бай содигәрләрниң бири 48 йашлиқ шаһзадә давут вә униң 19 йашлиқ оғли сулайман, окйан дәрвазиси (OceanGate) ширкитиниң қурғучиси стоктон руш, фирансийәлик су асти парахоти матроси павл хенрий наргейолет (Paul Henry Nargeolet)  бар иди.

сәпәр вақти 2.5 саәт әтрапида тәхмин қилинған су асти парахотиниң «Polar Prince» намлиқ парахот билән болған алақиси 1 саәт 45 минуттин кейин үзүлүп қалған иди.

пакистан ташқи ишлар министирлиқи йоқап кәткән су асти парахотида җенидин айрилған бәш киши үчүн тәзийә телеграммиси елан қилди.

телеграммида, йоқап кәткән су асти парахотидики шаһзадә давут билән оғли сулайман давутни өз ичигә алған бәш кишиниң өлүми мунасивити билән, уларниң аилилиригә вә йеқин-йоруқлириға сәвр тиләнди, нурғун дөләтләрниң  су асти парахотини тепиш үчүн көрсәткән тиришчанлиқлири үчүн тәшәккүр ейтилди.