шиветсийә-норвегийә оттурисида ракета сәвәбидин йирикчилик йүз бәрди
шиветсийәниң тәтқиқат ракеталириниң бириниң нормал ишлимәй норвегийә земиниға чүшүп кетиши нәтиҗисидә, икки дөләт мунасивәтлиридә җиддийлишиш йүз бәрди.
түркийә авази радийоси хәвири: норвегийә рәсмий йоллар арқилиқ вәқәни уқтурмиғанлиқи үчүн қошниси шиветсийәгә наразилиқ билдүрди.
норвегийә ташқи ишлар министирлиқиниң байанатчиси рагнхилд сименстад (Ragnhild Simenstad) байанат елан қилип: «министирлиққа рәсмий уқтуруш кәлмиди. чеграда мушуниңға охшаш вәқә йүз бәргәндә, мәсулларниң мунасип йоллар арқилиқ норвегийә даирилиригә дәрһал хәвәр қилиши наһайити муһим. чүшкән ракетаниң зор зийан пәйда қилиш мумкинликини унтумаслиқ муһим. йеқилғу булғанған болуши, зәһәрлик маддилар бар болуши мумкин. тәләп қилидиғинимиз қаидә-пиринсипларға бойсунуш, уларға асасән һәрикәт қилиш» деди.
ракета қойуп берилгән шиветсийә есранге (Esrange) аләм мәркизиниң хадими марко кохберг бу вәқәниң интайин еғир икәнликини, сәвәбини пәрәз қилишқа техи балдурлуқ қилидиғанлиқини, әмма тәкшүрүш ахирлашқанда тәпсилий учурларниң берилидиғанлиқини ейтти.
у вәқә йүз берип узун өтмәйла даириләр билән алақә орнитилғанлиқини, ракета чүшүп кәткәндин кейин, келишимләр бойичә һәрикәт қилинғанлиқини байан қилди.
шиветсийәниң шималидики кируна әтрапидики есранге аләм мәркизидин дүшәнбә күни (24-апрел) шу йәр вақти 07:20 дә қойуп берилгән вә чеграға йеқин җайға чүшүши пәрәз қилинған ракета, нишандин чиқип кәткән иди.
шиветсийә аләм қатниши ширкити (SSC) қойуп бәргән тәтқиқат ракетаси 250 километир егизликкә йәткәндин кейин, линйәсидин чәтнәп норвегийәниң тағлиқ райониға чүшүп кәткән иди.
шиветсийә норвегийәдин әпу сорап вәқәниң тәкшүрүлүватқанлиқини билдүргән иди.
