һиндистан хитайниң талаш- тартишлиқ җайларниң намлирини өзгәртишигә қаттиқ наразилиқ билдүрди

түркийә авази радийоси хәвири: хитай аруначал прадеш өлкисигә қарашлиқ талаш-тартишлиқ чегра районидики 11 җайниң намини хитайчиға өзгәрткәндин кейин, һиндистан ташқи ишлар министирлиқи байанатчиси ариндам бағчи байанат елан қилип: «бу өзгәртиш хитайниң тунҗи урунуши әмәс, биз буни пүтүнләй рәт қилимиз» деди.

ариндам бағчи аруначал прадешниң һиндистанниң айрилмас вә өтүнүп берилмәс бир парчиси икәнликини тәкитләп: «ойдурма исимларни қойушқа урунуш, бу һәқиқәтни өзгәртәлмәйду» деди.

бу қетимқи йеңи җиддийлик хитай хәлқ ишлири министирлиқиниң 1- апрелда «җәнубий тибәттики бәзи җуғрапийәлик исимларни қелиплаштуридиғанлиқини» җакарлииши сәвәбидин башланди.

бу исим өзгәртиш урунуши тағ чоққилири, олтурақ районлар, дәрйалар вә өлкә пайтәхти итанагарға йеқин йезиниму өз ичигә алиду.

хитай 2017-йилиму тибәтниң мәниви даһийси далай ламаниң районни зийарәт қилишидин кейин, аруначал прадештики алтә районниң намини өзгәртишкә орунған иди.

2022-йили 12-айда иккинчи тизимликни ​​елан қилған хитай даирилири, райондики 15 җайниң намини өзгәрткән болуп, һиндистан буниңға қаттиқ наразилиқ билдүргән вә өзгәртишләрни қәтий рәт қилған иди.

хитай билән һиндистан оттурисидики һималайа теғини орап туридиған чегра линийәси һәр икки дөләт оттурисидики игилик һоқуқ талаш- тартишлириға сәвәб болуп кәлмәктә.  дәрйа, көл, музлуқлар вә қарлиқ чоққиларни өз ичигә алған 3500 километирлиқ чегра районида икки тәрәп оттурисида пат- пат кәскин тоқунушлар йүз бәрмәктә.