гиретсийәдә үч күнлүк матәм елан қилинди
гиретсийәдә чаршәнбә (2023-йили 1-март) күни йүз бәргән пойиз вәқәсидә җенидин айрилғанларниң сани 57 гә чиқти.
түркийә авази радийоси хәвири: гиретсийә «ERT» телевизийәси елан қилған хәвәрдә билдүрүлишичә, лариса шәһириниң шималиға җайлашқан темпи районида бир йолучилар пойизи билән бир йүк пойизиниң соқушуп кетиши нәтиҗисидә, вагонлар релиштин чиқип кетип, алдидики вагонларға от кәткән вә 57 киши җенидин айрилған. әһвали еғир болған алтә кишини қошқанда җәмий 48 киши дохтурханида балнестқа елинған, 56 кишиниң дерики елиналмиған.
вәқә йүз бериши билән чиққан от сәвәбидин издәш-қутқузуш хизмәтлиридә вә харабиликтин чиқирилған бәзи җәсәтләрни тонуғили болмиғанлиқи, дерики болмиған йолучиларниң аилилириниң DNA тәкшүрүши үчүн әвришкә бәргәнлики билдүрүлди.
гиретсийә пирезиденти катерина сакелларопулу, баш министир кирйакос мичотакис, сәһийә министири танос плеврис, асаслиқ өктичи радикал сол иттипақ рәһбири алексис чипрас, муавин дөләт мудапиә министири никос хардалийас вә гиретсийә коммунистик партийәсиниң рәһбири димитрис кучумбас пойиз вәқәси йүз бәргән районға берип, мәлумат игәллиди.
гиретсийә һөкүмити дөләт тарихидики әң чоң пойиз вәқәсидин кейин үч күнлүк матәм елан қилди.
пайтәхт афенада пойиз вәқәси сәвәбидин намайиш өткүзүлди. намайишчилар парламент җайлашқан синтагма мәйданиға қарап пийадә йүриди. «вәқә әмәс, җинайәт» дегән шоар йезилған лозункиларни көтүрүвалған намайишчилар, җинайәтчиләрниң тепилишини тәләп қилди.
